Durante e ceremonia di “ground breaking” di WEB Aruba N.V. pa e “Sunrise Solar Park” situa na Lago Heigths, Director General y CEO di RdA N.V., Alvin Koolman a bisa di ta masha orguyoso cu RdA N.V. ta forma parti den e desaroyo di pais Aruba. El a splica cu na aña 2016, ora cu Valero a traspasa e Refineria y su facilidadnan pa Aruba, RdA a bira propietario di 3.7 miyon m2 di tereno, terenonan cu ta disponibel pa tipo di proyectonan manera esun di WEB. “Nos a sinta cu WEB y a otorga un recht van opstal di 92m2 pa por realisa e proyecto aki”.
Durante e ceremonia tabatin diferente discurso, un di nan tabata di Minister President Mike Eman cu a menciona cu kisas e situacion ta un poco contradictorio, si considera e Parke Solar y Refineria cual ta un fuel processor, situa asina cerca di otro.

Alvin Koolman a splica cu berdaderamente e ta un poco contradictorio awor cu Aruba ta bay tin un refineria cu ta funciona manera un upgrader den e produccion pa procesa crudo pisa, pero na mes momento e ta sostene e idea, paso un pais gradualmente mester bay den e direccion di energia sostenibel. RdA na mes momento tambe tin diferente proyecto cu ta canando paralelo cu locual ta e idea di un Aruba mas sostenibel.

Actualmente, Refineria di Aruba ta ehecutando e proyecto di ‘Carbon Capture’, caminda ta bay uza CO2 pa purba genera un tipo di Alga pa produci un producto cu a lo largo tin hopi mas balor cu esey, asina Alvin Koolman ta splica. Na final di Augustus, cuminsamento di September lo cuminsa cu preparacion di un laboratorio pa efectua diferente test pa mira cua tipo di Alga lo por produci. Si e proyecto aki ta exitoso manera ta anticipa, lo por construi un ‘Bio-Refinery’ hunto cu e ‘Upgrader’ actual.


E limpieza di e diferente terenonan cu a traspasa pa RdA, tambe ta den pleno ehecucion. E limpieza di e terenonan aki ta contribui na diferente proyecto cu por wordo conduci entre waf y BSL Laundry, cual lo ta hopi atractivo pa San Nicolas y Aruba general. RdA a lucha di cuminsamento pa e Refineria por start-up manera un ‘Clean Refinery’. Esaki ta nifica cu bo ta uza gas pa no solamente kima den foronan pero tambe den e parti di produccion di hidrogeno, di cual a bin cu e proyecto pa e liña di gas for di Venezuela.
Alvin Koolman ta añadi cu e proyecto ta andando den bon direccion y pronto lo haya un update riba e proyecto. Tur cos ta indica cu na September lo cuminsa cu construccion di e liña di gas, cu lo dura aproximadamente 18 luna, pues den e prome kwartaal di aña 2019. E refineria por start den e di dos fase cual ta indica cu e Refineria lo draai completamente riba gas. Esaki sigur ta algo hopi positivo pa pais Aruba y ainda mas pa nos medio ambiente. Finalmente, Alvin Koolman a termina felicitando WEB Aruba N.V. cu nan Parke Solar cu pronto lo ta operacional, algo cu sigur ta un stap mas den e direccion pa un Aruba sostenibel.

Desde dia 1 di october 2016 Gobierno a funda Refineria di Aruba N.V. cu tin e concesion pa maneha e refineria, e terenonan y ta supervisa e huurdo, CITGO Aruba Refinery, den nan operacionnan diario. Alvin Koolman, un experto den e industria petrolero, ta na cabes di e compania, cu ta doño tambe di Fuels Marketing & Supply Aruba cu ta maneha distribucion di gasolin, diesel y fuel oil pa nos pais.