(CuraçaoChronicle) – Caribbean Petroleum Refinery a keda aproba pa e accionista di Refineria di Corsou (RdK) como e compania cu ta bay continua den negociacion cu RdK cu meta pa sigura un partner cu ta manage y opera e facilidadnan petrolero na Corsou.

Ta bay instala un comite di negociacion door di Gobierno y RdK, cu meta pa finalisa e negociacionnan y yega na un acuerdo pa dia 1 di september proximo.

Caribbean Petroleum Refinery ta un consorcio di seis compania Mericano y uno di Brazil. E consorcio aki ta bay tin aliansanan strategico cu varios compania mayor di azeta y gas. Caribbean Petroleum Refinery ta aspira na un lease di 30 aña cu posibilidad di un extension di 10 aña adicional.

E consorcio tin plan pa duna trabao na mas di 800 empleado directamente. Ta bay converti e refineria na run-on gas pa asina cumpli cu normanan ambiental. Ta bay pone e terminal na Bullenbaai den operacion inmediatamente. Ademas, mester menciona cu e scol vocacional di e refineria ta bay habri back y como parti di su responsabilidad social corporativo, e compania ta comprometi pa inverti den desaroyo di deporte y scol riba e isla.

Fin di februari ultimo, RdK a move e fecha riba cual mester a entrega propuestanan pa opera e refineria na fin di maart, riba peticion di varios di e companianan cu tabatin mester di mas tempo pa finalisa nan due diligence pa asina entrega nan propuesta. Tres compania a entrega nan oferta final pa maneho y operacion di e facilidadnan na momento cu a entrega nan propuesta obligatorio na RdK. E team di RdK a cargo di e buskeda y seleccion di un partner strategico pa e refineria rapidamente a continua cu nan esfuerso pa evalua e ofertanan ricibi, pa asina inmediatamente presenta e resultadonan di e evaluacion y nan conseho na director di RdK, hunta supervisor di directornan, y accionista di RdK.

Siman pasa a obtene tur aprobacion formal pa selecta Caribbean Petroleum Refinery como e preferred bidder y continua e fase di negociacion.

For di e siman aki, team di negociacion di Gobierno y RdK ta bay cuminsa su negociacionnan cu Caribbean Petroleum Refinery. Acuerdonan separa tambe ta bay wordo negocia cu companianan estatal Curoil, Aqualectra, KTK y Selikor.

E meta ta keda sin cambio, loke ta nifica cu no mas tarda dia 1 di september proximo mester yega na un acuerdo, y inmediatamente despues cuminsa cu inicio di operacionnan di facilidadnan petrolero na Corsou.

LEAVE A REPLY

Please enter your comment!
Please enter your name here