(NLTimes) – E reactor nuclear na Petten, cual tin 4 siman sin pa causa di un lik, no lo cuminsa traha bek te cu dia 17 di maart.
Sinembargo, te ainda no a ser confirma si e fecha aki ta realistico, segun un vocero di e operador di e reactor NRG. E lik den e sistema a ser haya riba e dak di e sotano, y a preveni e reactor di bolbe bek online despues di mantenimento.
“Actualmente nos ta den e etapa di preparacion prome cu reparacion. Nos a haci un proposicion cu mester di aprobacion di nos supervisor, e Authority for Nuclear Safery and Radiation Protection (ANVS). Na momento cu e proceso aki ser completa, nos por cuminsa ahusta e sistema, y despues bolbe activa e reactor,” e vocero a comenta.
Petten ta e suministro mundial mas grandi di ‘radioisotope’ medico cual ta usa pa diagnostica cancer y pa trata hendenan cu e malesa. E ‘isotopes’ nan aki ta usa pa radiacion di cancer den metastase. Tambe nan por ser usa pa trata pashentnan cu malesanan cardiovascular, y personanan cu infeccion.
E reactor Petten ta provee mas o menos 40 porciento di e mercado global di radioisotope. Mientras cu un otro reactor na Belgica a ser cera pa mantenimento planea, e reactor Hulandes aki a provee pa mita di e suministro mundial. Belgica y Hulanda hunto ta responsabel pa 65% di e suministro global di ‘medical isotopes’.
Actualmente, pashentnan di hospital por ser acomoda cu ‘radioisotope’ di otro reactornan rond di mundo, NRG a declara. “Pero si nos keda sin opera pa mas largo cu dia 17 di maart, eora nos lo tin un situacion diferente y nos lo mester reevalua e situacion. Si nos mira cu nos no lo logra cumpli cu e fecha aki, nos mester mira con e otro reactornan por yuda cu e situacion di un otro manera.”
Dutch Association for Nuclear Medicine (NVNG) a indica na comienso di februari cu algun hospital na Hulanda no por conduci e cantidad di scan cu nan lo kier pa causa di problemanan na Petten. E organisacion lo publica un calculacion nobo tocante e situacion den e dianan binidero.
