image.jpeg

Despues di tur e euforia di diabierna ultimo ora cu gobierno a anuncia un acuerdo cu Citgo pa reapertura di e refineria, a keda hopi pregunta ainda sin contesta. Durante e rueda di prensa caba gobierno a keda debe varios contesta y a bisa cu den e dia y simannan nos dilanti lo por duna mas informacion tocante esaki. Esey ta parce nos sumamente necesario tambe, y lo ta bon pa simplemente publica e acuerdo firma. 

Un prome punto cu a resalta ta cu no a tende ni mira absolutamente ningun comentario di banda di Citgo, Pdvsa, gobierno Venezolano, ni di Valero. Esey mientras cu nos por supone cu pa nan tambe e acuerdo aki ta di suma importancia. Pa Citgo e lo significa e inversion mayor di e proximo añanan cu sigur ta di importancia pa anuncia na su “shareholders”. Te awe e compania no a publica nada ainda riba su propio website di e asunto di negociacion ni di e acuerdo aki.  For di banda di Pdvsa y gobierno Venezolano por supone cu e acuerdo lo significa un evento di importancia den nan maneho di yega na naphta pa nan produccion di crudo mehora, loke te na e momento aki nan ta regla cu compra di naphta via proceso di destaho riba mercado internacional. Logicamente e caminda cu ta scoge pa aki algun aña haya un fluho di  naphta ta bin di Aruba mester por sucede na un prijs cu por lo menos no ta mas halto cu loke ta paga segun prijs riba mercado internacional.

Den esaki ta un poco straño cu Citgo/Pdvsa lo ta asumiendo e responsabilidad di crea un infrastructura caro pa por uza gas natural via tuberia na Aruba, sin cu tin un bista riba e gastonan di e proyecto aki. Durante e rueda di prensa e pregunta a ser haci pero ministro de Meza a evadi un contesta directo. Lo ta logico cu e gastonan di e tuberia no ta inclui den e cifra cu a menciona pa rehabilitacion di e refineria mes.  Ta straño tambe cu nada a ser bisa te awor tocante e envolvimento di tanto gobierno Venezolano ni gobierno di Reino pa loke ta e aspectonan cu ta toca un inversion asina grandi riba teritorio di ambos pais.  Si nos ta comprende e anuncio di gobierno bon, tur e aspectonan aki ta ‘open ended’ ainda.

Un pregunta cu ta keda ta con Citgo ta bay inverti biyones den rehabilita y crea infrastructura pa gas, y gana esaki bek via un proceso cu no ta duna nada mas cu naphta y ‘intermediate feedstocks’ cu Citgo por uza den su refinerianan na Merca, pero cu e oferta super barata di crudo di bon calidad na Merca na e momento aki no necesariamente tin mester di e producto intermedio aki, sigur mirando e gastonan di transporte cu ta envolvi aden.

Tambe lo ta interesante pa sa kico mas a acorda cu Citgo, mirando cu por ehemplo Citgo a lanta na Aruba caba cuatro compania local. Un di nan ta pretende segun su statutonan di bira e ‘port authority’ ( autoridad di puerto) na San Nicolas y hasta a pone den su metanan cu e por bay importa y exporta container pa cuenta di tercera persona. Ta bay sucede den haf di San Nicolas hopi mas cos cu loke ta conta nos te awor? Nos por a presencia den e dianan aki e problemanan cu tin na Barcadera cu recepcion di barco di carga mas grandi, algo cu Camara di Comercio a premira varios aña pasa caba. Pa e motibo ey a surgi e idea di un haf di container internacional na San Nicolas cu tin condicionnan natural superior pa haci esaki. Gobierno sin anuncia nada ta trahando riba mas asunto riba e tereno aki pero no ta considera e publico di Aruba ‘digno’ ainda pa haya sa kico ta bay tuma luga? Nos ta observa cu tur partido representa den parlamento actualmente a keda contento cu e acuerdo cu gobierno a logra. Pero esey significa tambe cu no tin un solo pregunta riba e detayenan?

Por ultimo ta importante contempla henter e asunto desde un perspectiva mas amplio cu esun di un re inicio di un actividad economico y su beneficio economico directo. E refineria ta keda e ruman ohochi Siames di un ciudad cu a conoce solamente deterioro socioeconomico durante e ultimo trinta añanan. Cera o habri refineria na varios ocasion practicamente no a trece cambio den con e ciudad ta mustra, cu su cayanan mal manteni, cantidad di vivienda completamente decai y un centro comercial destrui, carece di mayoria di servicio comercial y publico cu e poblacion mester y merece. Si no tene cuidao, ta habri un refineria atrobe, pero fuera di algun actividad economico mas, e transformacion den un ciudad cu tin loke e mester tin pa ta un luga digno di biba aden no ta tuma luga, no por ‘arte de magia’. Aparte di algun proyecto aki aya, nunca ningun gobierno a asumi responsabilidad pa un plan general di rehabilitacion di e ciudad. Awor ta e oportunidad pa haci esey.

 

LEAVE A REPLY

Please enter your comment!
Please enter your name here