Reformanan riba diferente tereno ta dirigi pa mehora perspectiva; Grupo mixto di expertonan Hulandes y di Aruba ya caba ta revisando sistema di enseñansa

Economia di Aruba mester bira dinamico, resiliente y elastico. Y pa logra esaki mester haci cambionan tambe den e structura di seguridad social cu mester bira robusto y pagabel, pa asina tin e estimulonan na nan luga.

Esey ta e plan di COHO, e entidad Caribense pa Reforma y Desaroyo. Mercado Laboral lo mester pasa door di un analisis, incluso tur e leynan y areglonan, pa asina por determina con por modernisa y actualisa e sector aki. Medidanan manera baha oranan di trabao, permiti trabao part-time, contratonan pa periodo specifico, flexibilisacion di e ley di retiro, eliminacion di e estorbonan pa emplea trahadonan di exterior, bringa labor ilegal y con pa elimina desempleo memey di hobennan lo ta parti di e investigacion grandi aki. Lo usa informacion cu Aruba ta duna. Y ta a base di e analisis aki lo desaroya y implementa proposicionnan.

Locual si ta hopi cla ta cu pa aki un par di siman, dia 15 di december 2020, partner y miembronan di famia di ambtenaarnan Hulandes cu a keda asigna na Aruba pa trabao, lo haya admision automatico sin mester pasa e proceso di haya permiso di residencia di DIMAS. Manera ta conoci, e LTU, Landsverordening Toelating en Uitzetting a inclui cu tur ciudadano di Reino mester entrega peticionnan na DIMAS, hasta huesnan y miembronan di Marina Real. Den practica e proceso aki a bira un molester enorme, y pa hopi aña, Hulanda ta urgi Aruba pa trece cambio den e parti di e proceso di admision aki.

E investigacion tambe lo produci data riba e grandura di e economia informal di Aruba, mescos con ta usa forsa laboral consistiendo di hendenan cu no ta legal na Aruba. E instruccion pa e investigacion aki mester ta formula pa 1 di februari 2021.

E enfoke ta pa e structura di seguridad social di Aruba haya un funcion di activacion, cu e estimulonan necesario cu ademas ta percura pa un red di seguridad adecuado. E cambionan mester bin a base di analisis, y mester mira nan como parti di e reformanan riba tereno laboral.

Pensioen

Na 2025, Aruba lo aumenta e edad di pensioen pa 66, a lo menos cu for di investigacion independiente sali afo cu e aumento di e edad aki cinco aña no ta realistico y cu tin proposicionnan alternativo pa e mesun efecto presupuestario. Un instituto economico independiente, cu COHO den deliberacion cu Aruba, lo pone riba mapa kico ta e efectonan presupuestario structural pa laga e sistema pagabel y lo por aumenta e edad te hasta door di mar’e na expectativa di bida y ta haci e calculacionnan pa e proposicionnan. Hulanda y Aruba lo ricibi e resultadonan pa asina mira con por duna contenido na esakinan.

Clima di inversion

Pa COHO, e ta esencial pa mehora empresaria y clima di inversion. Como tal, lo optimalisa e importancia di e structura di permiso, baha e gastonan pa haci negoshi y elimina e burocracia. E plannan concreto mes lo keda desaroya y implementa despues di un revision integral. Gobierno di Aruba a bisa cu su maneho di otorgamento di tereno ta mara na un vision pa recuperacion economico. Gobierno ta mara na e Plan di Desaroyo Teritorial, ROP, cu ta mas bien un cuadro di ley, sin cu tin e areglonan specifico. COHO a bisa cu mester desaroya y implementa un maneho di tereno y di ordenacion di espacio y cu esaki lo keda ehecuta basa riba e agenda di implementacion. Manera Bon Dia Aruba a publica, Raad van Advies a duna un conseho amplio riba e terenonan aki, y ta concorda hopi cu locual COHO ta considera necesario.

E meta di COHO tambe ta pa mantene e crisis di Covid19 bao control y garantisa e continuidad di e cuido, ademas di restructura e cuido y realisacion di uno cu ta robusto y pagabel. Aruba como tal mester sigui e consehonan di e Outbreak Management Team (OMT) unda ta tene cuenta cu ta tene e capacidad di Unidad di Cuido Intensivo disponibel na nivel; fortifica servicionan di salud publico (contact tracing), mantencion di capacidad di materialnan protectivo (PPE’s); mantene y expande e capacidad di test; garantisa capacidad suficiente di air ambulance; compra di vacunanan contra Covid, asina cu nan ta disponibel.

Pero pa loke ta e sector di cuido di salud pa futuro, COHO ta kere cu e hospitalnan den region mester traha cu otro y percura cu por aumenta eficiencia door ofrece cierto servicio na otro, pa evita cu nan ta inverti den e mesun tipo di capacidad. Door di un palabracion administrativo lo reduci e cantidad di pacient cu ta manda pa exterior, ya cu por aumenta e cuido specialisa den e hospitalnan regional mes. Lo baha e gasto riba material, door di haci compranan conhunto riba medicamento, medionan, material y aparatura.

Mas ainda COHO ta bay enfoca pa planifica entrenamento y programanan di educacion pa capacidad di e personal di cuido. Di e forma aki, Aruba lo participa hunto cu e otro paisnan Hulandes den Reino pa baha gasto di estudio den exterior. Lo bin racionalisacion di cuido di laboratorio ademas di reduccion di e cantidad di laboratorio, mientras cu specialistanan medico ta drenta den servicio salarial di hospital. Instancianan cu ta brinda seguro pa cuido medico hunto cu e autoridad di cuido di Hulanda lo recalibra e forma con ta calcula e gastonan y tarifanan pa e di dos liña di cuido. Lo bin cu proposicionnan, cu por inclui recalibracion di paketenan cu AZV ta cubri, door di introduccion di contribucion propio. COHO a bisa cu ta bay tene cuenta cu e desaroyonan social economico a consecuencia di Covid19.

Enseñansa

Un grupo di experto di enseñansa di Hulanda y Aruba ya caba a cuminza cu un revision di henter e sistema educacional di Aruba, cu ta inclui e sistema di scol publico y di entidadnan priva, manera fundacionnan. Esaki tabata un di e pasonan cu segun Hulanda, mester tuma paso mesora, sin warda riba e creacion di e COHO. E meta general ta pa realisa un calidad basico di enseñansa; realisa un bon conexion entre enseñansa y mercado laboral; y percura cu tin un bon fluho di continuacion entre e sistemanan di enseñansa, incluso pero no limita na Hulanda mes.

Locual e team di experto ta trahando riba dje awor aki ta pa midi e calidad di enseñansa, metodo y medionan di les; conexion entre enseñansa y mercado laboral; fluho entre tur e nivelnan di enseñansa, for di preparatorio, secundario y superior, incluso pero no limita na Hulanda; eficiencia y efectividad di e gastonan di enseñansa, mitiga ineficiencianan di e sistema; reforsa e mehoracion di calidad pa medio di supervision efectivo, entre otro pa medio di Inspeccion di Enseñansa.

Tambe e ekipo lo traha pa mira con pa mehora cooperacion cu instancianan educativo y di desaroyo den region y eventualmente na Hulanda. En todo caso lo envolve e Inspeccionnan di Enseñansa di Hulanda y Aruba, eventualmente cu sosten di e Inspeccionnan di Corsou y St. Maarten. Y asina cu caba cu e revision lo desaroya y implementa medidanan. Mester bisa cu Bon Dia Aruba a ricibi un prome reaccion riba e trabao di e team di experto aki. “Hulandesnan ta keihard,” ta locual a bisa na Bon Dia Aruba.