15EntrevistaReginald.jpg

Den un entrevista exclusivamente cu Bon Dia Aruba Reginald Danies a conta kico ta bay pasa awo despues cu finalmente detencion a cay pa e persona acusa den su caso di a abusa sexualmente di dos yiu di dje. Tambe Sr. Danies ta aclaria storianan cu a sali den medionan di comunicacion riba e asunto di su detencion cu a tuma luga diaranson.

Manera ya nos a publica via di comunicado di polis, ta cu sr. Tromp y sr. Danies a wordo deteni ayera, sinembargo Sr. Danies a wordo laga den libertad poco rato despues. Locual a sali den medionan di comunicacion ta indica cu polis a papia duro cu Sr. Danies riba su actonan, algo cu Sr. Danies ta nenga cu a pasa.

El a bisa: “Nan a bisa mi cu mi ta keda aangehouden, anto ora cu mi a yega warda nan a pone mi den un camber friu. Despues di basta rato nan a bin pa interoga mi. Nan a mustra mi un stapel di aña pasa, di locual cu mi ta haciendo. Mi a puntra nan e momento ey dicon nan ta haci esaki awo y cu mi a kere cu ta VNO a pone pa detene mi. Nan a contesta cu esey a conduci berdad na e detencion cu caracter di urgencia.” Sr. Danies a conta di a bay den un discusion e momento ey cu e recherche como cu ta pasobra ta un ‘macamba’ a reclama cu awo si ta core haci detencion. Finalmente e chef sr. Hodge a yama e recherchenan pa un reunion. Despues di a bin y bay dos biaha, Sr. Hodge mes a bay papia cu Sr. Danies y a bis’e cu su caso ta dificil y e no por detene. E fout ta na JZP y pues nan mester atende cu e caso, pasobra locual cu e ta bringando pe, e tin derecho di bringa pe, Sr. Danies a conta esaki na Bon Dia Aruba. Sr. Hodge a bisa sr. Danies tambe pa esun cu tin pregunta di esaki pa tuma contacto cu ne.

Awe mainta Sr. Danies a keda di bay dilanti di Parlamento pa purba papia cu Prome Minister Mike Eman. Como meta e tin, pa papia cun’e tocante e sistema di investiga casonan di abuso contra mucha, y tambe e ley pa hisa castigo di pedofiel. Bon Dia Aruba a puntra Sr. Danies ki ta su proximo pasonan awo cu Sr. Tromp ta deteni. El a bisa cu e ta bay sigui busca pa e cambionan cu mester bin, y lo tin un miho bista di ki direccion pa bay despues cu e papia cu Prome Minister.

Pa locual ta Sr. Tromp, segun Ministerio Publico e ta deteni pa a comete actonan sexual indebido cu un persona menor di edad, segun Vocero Ann Angela. A pesar di esaki hopi ta cuestiona e hecho cu Sr. Danies mester a haci tur locual el a haci, pa a yega na detencion di e persona cu a abusa di su yiunan.

 

LEAVE A REPLY

Please enter your comment!
Please enter your name here