Despues cu Merca a reestablece su relacion diplomatico cu Cuba y cu e isla aki ta den proceso di un reapertura economico, ta wordo conoci cu Hulanda ta desea di fortalece su relacion comercial cu e isla comunista aki.
Ta asina cu Minister di Comercio di Hulanda, Lilianna Ploumen a yega Cuba cu un delegacion nada menos cu di 77 empresarionan diadomingo ultimo. Informacion divulga pa agencia di prensa internacional ta indica cu e mandatario aki den representacion tambe di e paisnan di Reino Hulandes (Hulanda, Corsou, Aruba y St. Maarten) ta realisa un bishita oficial ta busca fortalece e relacion bilateral.
El a bay compaña dor di minister di Desaroyo Economico d Corsou, sr. Eugene Rhuggenaath, y Minister Plenipotenciario di Aruba, sr. Alfonso Boekhoudt, kendenan lo permanece te mañan na Cuba. E mision comercial aki ta conta cu representantenan di empresanan grandi manera Philips, Unilever y Heineken. Tambe e empresanan Caribeño di St. Maarten, aeropuerto di Corsou y Zona Franca di Aruba.
E empresanan cu a bay bishita Cuba ta relaciona cu e areanan di recurso hidraulico, asunto maritimo, agricultura, produccion di alimento, salud, biotecnologia y energia renovabel. Tambe aña pasa Camara di Comercio di Aruba (KvK) a yega di organisa un mision comercial pa explora posibilidad di negoshi na Cuba.
Actualmente Hulanda ta e di dos socio comercial mas importante di Cuba cu Europa. Nan ta exporta na Cuba alrededor di 116,8 miyon dollar den diferente producto/servicio, mientras cu nan ta importa 131 miyon dollar fei Cuba, segun datonan di paisnan Europeo.
