Ya caba parlamentario, Rocco Tjon kende ta miembro di e fraccion MEP, a manda un señal cla riba con lo ta e linea di relacion cu Hulanda den e fase aki di instalacion di un parlamento nobo y formacion di un proximo gobierno di coalicion (MEP-POR-RED). E dos factor cu lo determina e caracter di e relacion Aruba-Hulanda lo ta basa riba dos factor: Respet mutuo y cooperacion real, asina parlamentario Tjon a bisa.

Tambe el a laga sa cu uzando e plataforma di parlamento nan lo bin cu proyectonan pa combati ilegalidad y na mesun momento inventarisa y actualisa tur e leynan anticua cu tin. Pero tambe bin cu iniciativa di ley cu ta mehora e trabou di tur esunnan cu ta traha den tereno di husticia.

Teniendo na cuenta su background riba tereno di husticia, parlamentario Tjon a expresa kico lo ta e areanan cu e ta bay enfoca riba dje den su funcion nobo como miembro di Staten. Nan ta husticia y asuntonan di Reino.

Hulanda
Parlamentario Tjon a pone atencion riba asuntonan den Reino mirando e acuerdo di gobernacion cu a wordo cera recientemente na Hulanda. Ya cu pa loke ta e region aki den reino, Hulanda ta enfoca riba aplicacion di leynan. P’esey e ta considera cu ta importante for di Parlamento nan por percura pa e ‘relacion aki ta a base di respet mutuo y un cooperacion real tambe’.

El a laga sa cu tin diferente tema cu nan mester enfoca riba dje. Pero e ta kere cu ta hopi importante pa nan mustra tambe como pais cu ‘nos ta madura suficiente pa atende cu nos mesun problemanan’. Sinembargo e ta considera cu como pais nos mester ta habri pa e cooperacion.

Parlamentario Tjon a reitera cu partido MEP ta semper habri pa cooperacion y muy particular cu Hulanda . Pa januari proximo lo tuma luga e proximo reunion inter parlamentario di reino Hulades (IPKO), caminda e miembronan di parlamento nobo reciente instala di Aruba lo haci nan debut dilanti nan coleganan di reino.

Husticia
Pa loke ta trata tereno di husticia, e ta kere cu ta existi diferente plataforma pa bin cu mehoracion riba e veld aki. Aworaki como miembro di Staten, e ta kere cu pa medio di e comision cu tin di haber cu asunto di husticia, nan por trata asuntonan riba aplicacion di ley pero tambe riba maneho di ilegalidad, adiccion y prizon.

E ta kere cu dos aspecto legal cu pronto nan lo tin cu atende cu ne ta e dilema cu tin riba inspeccion preventivo. Esaki ta un autoridad cu polis a boga hopi tempo pa bin cu e sistema Hulandes cu pa medio di informacion nan sa cu cierto areanan ta di cierto riesgo pa comete delito of criminalidad. Pues e area aki ta pre defini caba pa medio di ley pa polis por actua pa rista den e area, sin ta condiciona of mara na un autorisacion pre determina.

Aworaki polis por rista personanan unabes cu esaki ta wordo anuncia den cierto areanan y entre cierto oranan. Pues parlamentario Tjon kende a forma parti di e cuerpo di polis y kende a fungi como director di KIA ultimo tempo, ta haya cu e instrumento legal aki no solamente lo permiti cu e trabou di polis bira mas eficiente y safe. Pero na e mesun momento e lo haci nos comunidad den general mas safe.

Tambe el a referi na maneho di prizon. E ta haya cu mester busca e forma legal pa explora pa bin cu admision electronico pa e presonan, ya cu e lo alivia e peso di e trahadonan di prizon. Pero na e mesun momento e lo yuda pa baha gastonan cu ta mara na maneho di prizon.