Dialuna mainta, durante un conferencia di prensa, a splica tocante e trabou cu ta tumando luga na Instituto Medico San Nicolas (ImSan) pa renobacion y expansion cu lo keda cla na maart 2020.

Director di ImSan, Dr. Joel Rajnherc a bisa cu ta bayendo cu e schedule y ta kere cu ta bay cumpli cu caba e trabou na tempo. Ta trahando di departamento pa departamento, asina pida pa pida keda cla. “Nos ta riba schedule y ta gradici na tur hende cu ta contribui cu esey, specialmente na tur contratista”, Rajnherc a bisa.

Galed Hakim, Director di International Healthcare Partnerships na Baptist Health International na Florida, a splica cu ta den asociacion cu ImSan for di 2012 den un proyecto grandi y ta impresiona cu e ‘progreso y eficiencia’ cu ta tumando luga na San Nicolas.

Nan a mira na algun area cu ta mustra e parti di radiacion y oncologia. “E ta absolutamente fenomenal. E ta mustra espectacular. Pa tin un proyecto di e magnitud aki, anto pa ta na tempo y den presupuesto ta tuma dedicacion y esfuerso”, Hakim a expresa.

Tambe a bisa cu ta esfuerso di cada individual den e team y ta contento cu ImSan a relaciona cu Baptist Health International. Nan idea ta pa yuda Aruba, promove e cuido di salud na un standard cu cada pashent mester ta custuma na dje, ‘calidad halto di cuido y eficiencia’.

Nan team tin 11 hospital y cu esfuerso nan a completa otro proyecto 2 aña pasa y ta den operacion. Nan protocol ta basa riba Memorial Sloan Kettering di New York y ta contento pa comparti nan conocemento pa Aruba.

“Pa asisti pa yega na e tratamento adecua pa e pashent, tratamento cu ta rekeri na Aruba y tratamento cu nan merece, sin cu nan mester biaha otro pais. E proyecto aki ta importante pa e isla. E team a compromete y nan deseo ta pa haci e proyecto pa cada pashent”, Hakim a expresa.

Laura Kozloski, kende ta encarga cu proyecto internacional y ta encarga cu ‘International Market Analysis and Development’ na Baptist Health South Florida, ta realisando inspeccion cu su grupo di arkitecto y ingeniero.

Kozloski a dirigi riba e progreso y servicio cu ImSan ta trece dilanti, cu ta importante pa Aruba. E area di remision, radiacion, oncologia, y servicio di oftalmologia, pa haci cu e pashent cu asisti no mester sali y nan por haya e tratamento ‘di nan dokter cu nan por wak tur dia y bay cas bek’.

Na Merca, Kozloski ta bisa cu nan tin 11 hospital cu casi 24.000 trahado cu ta yuda den trabou boluntario den operacion pa provee conseho y guia, unda cu ImSan di nan perspectiva por adopta, si ta den nan interes.

Tambe el a bisa cu ta contento cu e sosten cu a haya for di 2012 for di Ministerio di Salud, AZV, diferente Specialista y Dokter cu ta duna servicio na Aruba. “Nos ta kere ta importante pa for di entrada di e pashent cu lo ser trata akinan y esunnan cu lo trata pashent, for di e team te cu Dokter, por tin un facilidad cu nan por ta orguyoso di dje.”

Kozloski a menciona cu ningun hende ta scoge pa bay un hospital, ni pa bay Dokter. Hende ta bay Dokter pasobra nan mester, pues ora nan ta acerca un clinica, hospital of ImSan, e pashentnan por sinti ‘inmediatamente confortabel cu nan ta na un luga cu kier bishita’ en bes di ta un luga unda por sinti preocupa pa wordo atendi.

Pa finalisa, el a bisa cu nan filosofia na Baptist Health International ta cu nan no ta un organisacion cu fin di lucro na Merca, pero cu nan t’ey pa yuda comparti nan conocemento, experiencia y nan fout pa e no pasa na otro luga. “Pa nos yuda den cualkier area cu nos por pa mehora e calidad di cuido medico y experiencia cu nos a yega di haya.”

 

 

LEAVE A REPLY

Please enter your comment!
Please enter your name here