Net prome cu fin di siman, Parlamento a ricibi reportahe financiero pa loke ta ehecucion di presupuesto di pais Aruba pa 2017, cu ta e asina yama “Uitvoerings Rapportage.”
Parlamentario pa fraccion di AVP, sr Chris Dammers a confirma c’un biaha mas e reportahe financiero ta mustra cu Gobierno ta cumpliendo cu ehecucion di e presupuesto aproba pa Parlamento y a keda dentro di e cuadro di expectativa pa loke ta entrada y gastonan pa loke ta e di dos kwartaal di 2017.
“Desde cu Gabinete Mike Eman I a bin ta introduci e ‘Jaarrekeningen’ di pais, tur esunnan cu tabata atrasa y awe nos por bisa cu nos ta al dia, actual cu tur cuentanan anual manera ley di Comptabilidad ta prescribi.
Banda di esaki tambe Parlamento a yega di pidi pa cuminsa cu loke ta e kwartaal rapportage riba e presupuesto y si nos mira e prome reportahe cu a drenta caba y aworaki nos tuma nota di esun ‘halfjaar rapportage” y e conclusionnan, nan ta bisa cu mirando e situacion manera cu e tabata e caso na 2016 caminda a cumpli cu e 2% premira, awe nos ta mira cu pa fin di aña nos tin cu cumpli cu 0.5% deficit y na e momentonan aki, nos ta para na 0.7% deficit.
Ta bin acerca cu mirando cu tur locual ta entrada cu nos tin cu haya ‘vast’ ainda conforme cu ley, lo bay drenta den e di dos kwartaal, ta papia den e rapport aki di un situacion sumamente faborabel compara cu 2016 y cu sigur no tin duda algun den cual lo bay cumpli cu e deficit di 0.5% simplemente mira cu tur el entradanan di vast meter drenta ainda, tin e entradanan di e high-season di turismo cu mester drenta ainda.
Nos kier a manda un elogio pa cuminsa riba e contenido pa e rapport, e maneho tras di esaki cu Gabinete Mike Eman II ta logrando, e Minister di Finansa tambe y sin duda e empleadonan cu ta traha na departamento di Directie Financien cu a bin ta trahando riba diferente proyecto, pa percura pa loke ta cumplimento di e entrada y gastonan, ta hopi controla.
Nos ta sumamente contento cu contenido di e rapport nobo aki y nos tin cu mira con nos ta bay yega final di aña caminda ya caba awor caba ta papiando di un situacion sumamente faborabel y nos ta sigur cu na final di e aña aki, e resultado lo ta ainda mas positivo cu locual a premira , loke sin duda nos ta anhelando,” Parlamentario Dammers a splica.
Na mes momento sr Chris Dammers a sigui mustra cu ora cu tuma di e maneho tras di e desaroyo aki y nos bay por ehempel na Corsou cu aworaki tin problema ya cu e mesun comision di CFT ta supervisando esaki, tin e situacion caminda cu e reportahe financiero ta mustra cu gobierno di e isla ey, ta 50 miyon for di e presupuesto den ehecucion cu ta n situacion doloroso pa Corsou mientras cu aki na Aruba e bon maneho di Gabinete Mike Eman II, a bin ta cumpliendo cu tur expectiva.
“Si nos compara e situacion awor cu e situacion cu nos a hereda na 2009, caminda cu economia a cay cu 15%, desempleo tabata na 12% y awe nos ta papia di un economia creciente di 3.4% y nos ta mira cu desempleo a baha te na 6% y sigur nos ta para tras di e maneho di Gobierno cu ta un maneho cu tin pueblo na pecho.
Si nos sigui e discusionnan cu a surgi den e debate cu a tuma luga siman pasa, nos ta lamenta cu algun di e participantenan, sigur algun cu tabata den gobierno actual, cu ora cu bo ta den in Gobierno of bo ta un Parlamentario cu a sostene gobierno, y bo ta bay debate y ta papia cosnan cu sigur no ta corecto, caminda a papia di e proyectonan di PPP cu a base di esaki e presupuesto ainda mester wordo paga, por mira den e presupuesto di pais Aruba caminda ya na 2015 nos ta pagando esakinan.
Na 2015 a cuminsa paga 15.6 miyon, na 2016 el a bira 21.1 miyon y den presupuesto 2017 cu Gobierno ta cumpliendo cu esaki, ya ta cumpliendo cu 30.5 miyon pa yega un ‘peak’ na 2019 na 63.5 miyon, cu ta un suma cu ta wordo calcula den e presupuesto di e pais y sigur ta alcansabel.
Pero ta di lamenta cu hendenan cu tabata sa y sa miho, ta bay debate papia disparate, buscando popularismo politico pa saca voto pero no sa cu ya esakinan tabata den presupuesto, ya ta den e maneho general di pais Aruba caba,” Parlamentario Chris Dammers ta mustra.
