Centenares di ciudadano Dominicano a manifesta diadomingo pasa na Santiago, segundo ciudad mas grandi di e pais, contra corupcion y pa expresa nan oposicion contra un reforma constitucional cu ta permiti reeleccion pa un tercer periodo di presidente Danilo Medina.

E manifestacion tabata convoca pa e movimento ciudadano Marcha Verde, cu a surgi na 2017 como reaccion riba e caso di corupcion relaciona cu e empresa di construccion Brasileño Odebrecht.

E organisadonan di Marcha Verde, cu ta defini su mes como un organisacion no partidista, a lesa un comunicado den cual nan ta protesta contra e posibilidad cu ta reforma constitucion pa permiti Medina opta pa un tercer mandato consecutivo den eleccion na 2020.

Un di e oradornan cu a lesa e comunicado a bisa cu e responsabelnan (di e corupcion) ta pretende sigui den poder, evitando bay prizon y debolbe tur e placa na e pais.”

Marcha Verde ta protesta e aparente impunidad, unda seis politico y empresario so ta bay corte pa e caso di Odebrecht a pesar cu e empresa mes a admiti cu a paga US$ 92 miyon na soborno na un grupo mas grandi.

E manifestacion a tuma luga despues cu a surgi revelacion nobo di soborno supuestamente paga pa Odebrecht pa haya e proyecto di e planta termo-electrico di Punta Catalina, un di e obranan impulsa pa gobierno di Medina y ta critica e procurador general Jean Alain Rodriguez pa encubrimento di e caso.

Medina, cu a keda reeligi na 2016, no a papia publicamente di e tema, aunke siman pasa diaranson el a comunica na secretario di estado Mericano, Mike Pompeo, cu ainda no a tuma un decision pa cu eleccion di 2020.