E prome vragenuur di Parlamento pa aña parlamentario 2026-2027 no a termina manera tabata planea ayera mainta, despues cu un conflicto entre coalicion y oposicion a escala y presidente di Parlamento a suspende e reunion. E tema di e vragenuur tabata trata delincuencia hubenil cu Minister di Enseñansa y Hubentud Gerlien Croes, pero e discusion a cambia direccion despues cu fraccion di MEP a lanta pregunta tocante pakico un vragenuur solicita door di parlamentario Rocco Tjon cu e mesun minister ta pendiente pa casi dies luna. Despues di e incidente, MEP a formalisa su obhecion den un carta urgente na presidente di Parlamento, pidiendo claridad tocante e base legal y factual pa no convoca e reunion solicita door di Tjon.

E vragenuur di ayera mainta a ser solicita door di parlamentario John Hart di AVP pa trata e problema di delincuencia hubenil. E meta di e reunion tabata pa minister Croes duna mas claridad tocante prevencion di delincuencia hubenil, abandono di scol, sosten pa hobennan vulnerabel y e contribucion cu enseñansa por tin den evita cu hobennan drenta den criminalidad.

Sinembargo, prome cu e tema por ser trata completamente, un desacuerdo a surgi den sala. E situacion a inclui interupcionnan y intercambio di palabranan fuerte entre parlamentarionan, despues di cual e reunion no por a continua.

Parlamentarionan di coalicion a expresa decepcion cu e reunion no por a continua y cu e tema di delincuencia hubenil finalmente no a haya e atencion planea. Miembronan di Fraccion di AVP y Fraccion di Futuro a lamenta e desaroyo di e situacion, señalando cu e conflicto den sala a impedi Parlamento di sigui cu e preguntanan y discusion tocante un tema importante pa hobennan di Aruba.

Di otro banda, parlamentario Rocco Tjon di fraccion di MEP ta indica cu durante e reunion el a presenta un punto di orden tocante un vragenuur cu el a solicita cu e mesun Minister Gerlien Croes. E peticion aki ta relaciona cu e asunto di un biahe den jet priva cu e minister a haci.

Tjon a presenta su peticion oficialmente dia 1 di december 2025. E peticion tabata inclui 36 pregunta relaciona cu e biahe cu minister Croes a haci pa Corsou na november 2025. Desde e periodo ey, MEP a sigui busca informacion tocante e asunto y a uza diferente procedemento pa trata di haya documentacion y contesta.

E asunto a resulta, entre otro, den un procedemento relaciona cu Landsverordening openbaarheid van bestuur y despues un procedemento di bezwaar bao Landsverordening administratieve rechtspraak, LAR. Na augustus, MEP a sostene cu e termino pa minister Croes tuma un decision nobo despues di conseho di Bezwaaradviescommissie LAR a vence. Minister Croes, di su banda, a mantene publicamente cu e biahe no a ser paga cu placa publico y cu e no tin obligacion di entrega informacion tocante un gasto personal.

Durante e reunion di ayera mainta, fraccion di MEP a bolbe trece dilanti e vragenuur pendiente mediante un punto di orden.

E fraccion a manda un carta oficial, fecha 30 di september y firma door di lider di fraccion Evelyn Wever-Croes, pa presidente di Parlamento. Den e documento, MEP ta compara tratamento di e peticion di Tjon cu esun di Hart.

Segun e carta, Hart a presenta su peticion pa un vragenuur dia 9 di september 2026 y Parlamento a registra esaki dia 11 di september. E reunion a ser convoca ainda durante mesun luna. Den contraste, segun fraccion di MEP, parlamentario Tjon ta wardando aproximadamente dies luna pa su peticion ser trata.

Pa e motibo ey e fraccion kier sa pakico e dos peticionnan a haya un tratamento diferente.

Un parti importante di e desacuerdo ta relaciona cu e procedemento LAR. Segun e carta di MEP, durante e reunion presidente di Parlamento a indica cu, basa riba conseho huridico cu el a ricibi, e procedemento LAR tabata e motibo pa cual e vragenuur solicita door di parlamentario Tjon no por a ser convoca.

MEP ta cuestiona e argumento aki. Segun e fraccion, no tin actualmente un procedemento LAR pendiente cu ta impedi tratamento di e vragenuur. E carta ta indica cu Bezwaaradviescommissie LAR ya a trata e asunto y a manda su conseho den juli.

MEP ta pidi ademas claridad tocante e conseho huridico menciona door di presidente. E kier sa cua consehero a duna e conseho, na cua momento esaki a sucede y na cua fecha Colegio di Hefe di Administracion (CHA) a autorisa pa busca e conseho huridico. MEP ta solicita tambe un copia di e conseho, sosteniendo cu un referencia general na e conseho di abogado no ta suficiente ora esaki ta ser uza como motibo pa limita posibilidad di un parlamentario pa eherce su funcion di control.

E carta ta cuestiona tambe un otro argumento cu, segun MEP, e presidente a menciona: existencia di un investigacion cu ainda ta andando. MEP ta indica cu no ta cla cua investigacion esaki ta, cua instancia ta ehecut’e y riba cua base legal existencia di tal investigacion lo impedi un parlamentario di eherce su funcion di control. P’esey, e fraccion ta pidi mas informacion tocante e investigacion y e motibo pa cual esaki lo impedi e vragenuur.

Den e contexto aki, MEP ta rechasa tambe e comparacion cu e investigacion anterior tocante Arubahuis. Segun e fraccion, durante e investigacion ey, Wever-Croes, e tempo ey como prome minister, hunto cu CAD y DRH, a aparece den Parlamento pa presenta informacion tocante e investigacion y contesta pregunta di parlamentarionan. Pa MEP, esaki ta mustra cu existencia di un investigacion no necesariamente ta impedi control parlamentario.

MEP ta conecta e argumentonan aki cu loke e ta considera un trato desigual entre coalicion y oposicion. E fraccion ta señala cu peticion di Tjon di december 2025, a pesar di 15 recordatorio, ainda no a ser trata, mientras un peticion presenta na september 2026 si a ser convoca den un tempo cortico. Segun MEP, mester tin un motibo obhetivo, transparente y verificabel cu por splica e diferencia den tratamento.

P’esey, MEP ta pidi presidente di Parlamento pa presenta por escrito e base legal y factual di su decision, identifica cua procedemento ta impedi e vragenuur y duna e number di caso corespondiente. Tambe e fraccion kier sa cua disposicion legal of reglamentario concretamente ta impedi tratamento di e peticion y di cua manera e procedemento menciona ta forma un obstaculo pa tene e vragenuur.

Ademas, e fraccion ta solicita un fecha concreto pa e vragenuur di Tjon ser poni riba agenda.

E carta ta pone e asunto den contexto di igualdad entre miembronan di Parlamento y derecho di Parlamento pa controla gobierno. MEP ta pidi pa presidente contesta e preguntanan prome cu e siguiente reunion di Parlamento. Un copia di e documento tambe a ser manda na Gobernador di Aruba.

E desaroyo aki a laga dos asunto sin conclui: e vragenuur tocante delincuencia hubenil cu no por a ser completa, mientras cu e conflicto a pone atencion nobo riba e peticion di Tjon cu ta pendiente desde december 2025.

Pa MEP, e diferencia den tratamento di e dos peticionnan ta lanta pregunta tocante igualdad entre parlamentarionan, mirando cu un vragenuur solicita recientemente door di un miembro di coalicion a ser convoca den e mesun luna, mientras cu e peticion di parlamentario Tjon ta pendiente pa casi dies luna. E fraccion awor ta spera un contesta por escrito di presidente di Parlamento cu por aclaria e motibo y base legal pa e diferencia den tratamento y indica na cua momento e vragenuur di Tjon eventualmente lo ser convoca.