Ayera banda di 10’or di mainta, gerencia di Elmar a reuni cu sindicato STA pa asina busca un salida na e impasse cu a presenta. E reunion a dura casi dos ora unda ningun di e dos partido por a yega na otro.
Mediador di gobierno Anselmo Pontilius a bisa cu den un reunion asina semper tin diferencia di opinion. Pero importante ta cu nan a haya e partidonan na mesa pa atende nan diferencia. E tabata un reunion cu mester a tuma luga dia 15 di september, pero e no a sosode.
Durante e reunion aki, gerencia di Elmar a sigui e recomendacion di mediador di gobierno pa duna un presentacion di e situacion real di e empresa na sindicato STA. Mediador di gobierno a percura pa traha un protocol y nan a mand’e pa e partidonan. Nan a traha esaki como un documento cu por yuda ambos partido sali for di e diferencia di opinion. Sinembargo ambos partido a abstene di firme.
Mediador di gobierno a invita un biaha mas pa e dos partido aki bin reuni diahuebs 4or atardi. Otro punto cu nan tin discusion ta tocante e representante cu STA a eligi na pia di trabou cu nan tin derecho di haya liber cu pago durante ora di trabou specialmente si tin reunion sindical. E ta haya cu nan ta punto cu nan por supera, pero mas cu tur cos ta importante pa dunado di trabou cu STA cu ta representa e mayoria di e trahadonan por traha di un forma harmonioso cu otro a pesar di nan diferencia di opinion.
E ta kere cu otro discusion cu lo keda pendiente den man di nan abogadonan ta esun di un contracto colectivo vigente si of no. Den e parti aki, e ta declara cu mediador di gobierno como institucion no por bay den niun direccion. Ya cu akinan nan ta tratando cu leynan cu cada partido por duna interpretacion. Por ta nan ta puntonan cu kisas corte mester duna un aclaracion. Pero el a laga sa cu e asunto di CAO no tabata e punto principal ayera, sino con e partidonan mester bay traha cu otro y atende cu otro ariba operacion diario di e empresa aki.
-300x224.jpg)
Elmar: no tin acuerdo cu STA
Nos no por a haya un declaracion ainda di STA. Pero di otro banda, director di Elmar, Robert Henriquez a declara cu despues di e reunion cu ambos partido a sostene dilanti di mediador di gobierno ayera, ta importante pa prome cuminsa papia di un manera bon cu otro. Despues di e prome paso aki nan por yega na acuerdo riba e delegadonan di e trahadonan, locual e ta considera esencial den futuro pa canalisa informacion.
Sinembargo el a laga sa cu ‘na e momento aki mi no tin niun tipo di acuerdo cu STA’. E ta reconoce cu ley ta pone cu obligatoriamente e mester negosha cu e sindicato mayoritario. E ta haya cu na 2020 cu ta caduca e CAO vigente, gerencia di Elmar lo por negosha cu STA, si ainda e sindicato aki ta representa e trahadonan.
E ta haya cu esaki ta e realidad y e punto esencial. E otro punto entre nan e reconocimento di e shopsteward nan ta asuntonan cu nan mester por yega na acuerdo. E prome reunion di informacion lo ta diahuebs awor atardi, y e ta spera cu e biaha ey e reunion por bay den un miho ambiente di loke el a bay ayera mainta.
E ta reconoce cu STA a gana e referendum y pa ley ora un sindicato gana un referendum gerencia di Elmar como doño di trabou tin e obligacion pa sinta negosha un CAO cu nan. Esey ta e situacion cu e problema aki tambe ta sinta, ya cu nan tin un CAO vigente te cu 2020. E ta haya cu e ora ey cu STA mester sinta warda aki casi 4 aña pa negosha un CAO nobo.
“Niun otro acuerdo mi no tin cera aworaki cu STA”, e director ta bisa. Den dado caso cu Elmar ta yega na un acuerdo cu STA, esaki nan lo atende dilanti di mediador di gobierno.
