Luciano Maduro di DHC

ORANJESTAD – Pa busca un caminda mas factibel y menos largo pa atende cu e derechonan di e consumidor, departamento encarga cu asunto di huur y derecho di consumidor lo tene un reunion cu miembronan di e ordo di abogado otro siman. E reunion aki lo tuma luga diaranson awor den instalacion di TNO. E cuponan ta limita y lo ta bon pa esunnan interesa tuma contacto cu Dienst Huur-en Consumentenzaken.

Derecho y procedura largo
Sr. Luciano Maduro a declara na  Bon Dia Aruba cu e departamento di gobierno ta tene supervision di e leynan concerni cu e proteccion di e consumido. Ora cu e consumido tin un keho, y nan mes no por a resolve of a pega cu ne, e por yega bati e porta di e departamento aki, y nan ta yud’e. Nan ta intermedia, pero nan tin cierto limitacion, pues nan autoridad nan extension ta limita. “Nos ta purba di yuda te unda nos por. E ley mes mester encarga su mes di resolve e problema”, el a bisa.

E ta admiti cu e manera con nos ley ta hinca den otro ta haci cu hopi bes e proceso cu e consumido tin cu cana pa busca su derecho ta frustrante, y tin biaha e no ta un resultado positivo pa e consumido. Te hasta si e consumido tin rason hopi biaha e no ta haya su rason asina lihe. Sinembargo nan ta consciente cu ora e consumido tin un keho y e departamento aki dificilmente lo por yud’e, su ultimo paso ta bay corte. Pero hopi consumidor ta trata di evita di bay te e instancia aki, pasobra e ta un proceso largo cu ta costa placa y tampoco tin garantia di exito.

Tin biaha keho tin di haber cu articulonan pa balor entre 200 pa mil florin, e ta un suma relativamente chikito pa lanta un caso contra negoshi. Tin tambe consumidonan cu ta bin cu keho mas complica cerca e departamento concerni, un  tipo di keho cu ta hayando forsa ta entre e hendenan cu ta construyendo un cas y e contratistanan.    
E pregunta cerca e consumido ta: No por tin algo otro pa haci pa mi keda cla lihe?

Frustracion y alternativa
Nan ta haya suficiente consumidor cu ta bin cu e preocupacion comun aki, ya cu nan no sa mas ki paso nan lo por tuma. Aunke e proceso ta haci un reclamo formal ta poni den ley, e ta uno largo y exigente. Pues e ta complica pa e consumido kico e tin cu haci, y ta e mesun consumido tin cu hacie, ya cu e departamento aki ta un intermediario so. Ta depende mas tanto di e cooperacion di e negoshi cu di e derecho di e consumido, si nan ta honra e peticion di nan cliente (consumido), si acaso como consumido bo tin un rason.  “Hopi negoshi ta bay argumenta cu e consumido no tin rason y e ta loke hopi biaha ta crea e frustracion cerca e consumido”, asina sr. Maduro a laga sa.

Den cuadro di yuda e consumido y alivia e caminda di cruz cu tin biaha nan mester pasa pa defende nan derecho, Dienst Huur-en Consumentenzaken ta organisando un encuentro cu e miembronan di e ordo di abogado. Sr. Maduro a bisa cu nan lo kier bini hunto pa busca alternativa cu lo por yuda e consumido defende su derechonan. Nan kier haya ideanan fei di abogadonan ya cu nan mes ta haya nan  mes cu kehonan di e consumido, pero mas tanto di e negoshinan como cliente.
Den e reunion aki nan lo kier tende riba posibel alternativanan practico cu lo por yuda mehora e proceso cu e consumido ta pasa aden.  E pensamento tras di e encuentro aki cu e miembronan di abogado tambe ta cu nan sa  haya caso relata na keho di consumido.
 

 

 

LEAVE A REPLY

Please enter your comment!
Please enter your name here