Richard E. Jacobs Jr. actualmente ta un maestro invita cu ta duna les di multimedia na Ibero American High School. Jacobs tin un trayectoria largo y exitoso den mundo di television, pero prome cu el a drenta den mundo di television, su prome amor tabata futbol. Den un entrevista cu Bon Dia Aruba Jacobs ta conta un poco di su carera den futbol y multimedia.

For di chikito caba, door cu su tata tabata hunga futbol, Jacobs a sigui e stapnan di su tata y el a cuminsa hunga futbol. Na un edad jong el a bay Hulanda y for di e momento ey el a sigui desaroya den futbol. Mita di su carera tabata na Hulanda y el hunga pa teamnan grandi na Hulanda. Despues el a bin back Aruba y el a hunga den varios seleccion hubenil y a representa Aruba na Santo Domingo, entre otro.

Jacobs ta conta cu durante su carera den futbol el a gana varios premio individual. El a gana, entre otro, premio di goalgetter di campeonato dos biaha, el a yega di sali MVP di e campeonato dos biaha y el a haya e premio di miho delantero tambe.

Durante añanan 90 el a forma parti di e seleccion di Aruba, representando Aruba den weganan pa eliminatorio pa mundial 1994, 1998 y 2002. El a forma parti tambe di seleccion di Aruba pa torneo di Campeonato di Caribe yama Shell Cup y na 2000 el a forma parti di e seleccion di Aruba cu a gana e seleccion di Puerto Rico 4-2..

Jacobs a studia den direccion di electro na Aruba y despues di a caba su estudio na Aruba el a bay Hulanda na unda el a sigui studia den e direccion di electronica.

Durante su estudio na Hulanda, Jacobs ta conta, tabatin un departamento cu tabata saca potret y nan tabata filma de vez en cuando, pero mas tanto saca potret. El a bay experiencia esey y el a gust’e asina hopi cu el a cuminsa cu esey.

“Mi a cuminsa bay mas profundo den dje. Pa loke ta filmacion mes, mi a cuminsa for di mi 14 aña caba ta filma diferente actividad rond di Aruba cu camara grandi. Semper mi a gusta e parti di filmacion. Asina mi a cuminsa y despues mas na grandi mi a haya mas experiencia,” Jacobs a conta.

Jacobs a yega di traha na Telearuba, despues el a haya e oportunidad pa traha na ATV y durante e temporada aki, el a remarca, el a haya hopi experiencia den e mundo di television.

Internacionalmente el a traha na diferente canal y programa di television. E ta conta cu el a yega di traha cu CNN, Fox, NBC, den e show di Larry King como camarografo y el a traha como camarografo tambe pa Nancy Grace e tempo ey.

E transicionnan di television pa scol a sucede pa motibo cu su dos yiu muhe tabata bay scol na Ibero American Highschool y durante e añanan cu nan tabata bay e scol aki, nan a ripara cu e ta haci trabou di multimedia y nan a acerk’e pa cuminsa duna les den e departamento di multimedia pasobra pa asina introduci multimedia. “Nan a busca acreditacion pa esey y aworaki despues di seis aña dunando les, e scol aki ta e unico scol cu actualmente ta duna les di multimedia completo,” Jacobs a enfatisa.

“Bo ta siña tur cos cu ta encera filmacion, editing, bo ta siña haci video editing, bo ta siña traha cu Photoshop, siña drecha potret, traha poster, bo ta siña tur cos cu tin di haber cu social media. Tambe nos ta duna e parti tecnico y un tiki trabou di IT,” el a agrega.

Por ultimo Jacobs ta conta cu loke mas e gusta di duna les na e scol ta inspira e muchanan cu tin un bentana habri pa e mundo di multimedia. “Bo por ta un persona hopi creativo, bo por haci hopi cos cu multimedia y locual mi ta gusta ta cu ora mi duna nan un tarea, mi kier pa nan haciele miho cu ta posibel, miho cu mi mes, dus e meta ta pa pusha e hobennan aki, pa nan usa nan creatividad y experiencia e mundo di multimedia a traves di cual nan por expresa nan mes den diferente forma.”