Rosa Leon: ‘Cas Marie den bo bario pa crea un esfera diferente’

Rosa Leon, case manager di ‘Cas Marie den bo bario’, a comparti tocante actividad cu nan ta tene den bario pa asina mas cliente cu demencia por conoce otro y pasa un tempo ‘agradabel’.

Leon ta splica cu nan ta activo na Sonrisa Paradera, Tanki Leendert y Paviljoen na Playa. Nan enfoke ta pa nan crea lo miho cu nan por, pa asina pashent cu demencia por disfruta. “Awo nos ta haciendo uzo di nan capacidad e momento ey. Pa duna nan amor y cariño cu nan mester.”

Cas Marie den bario ta pa persona cu demencia den fase uno. E pashent ainda ta activo, nan no ta mucho atras. Te ainda, nan tin un grupo di 12 persona, unda cu prome tabata menos pero a logra crece mas den transcurso di aña.

E proyecto Cas Marie den bario tin tres aña activo. Nan ta haci e actividad den bario pa duna e ‘mantelzorg’, e persona cu ta cuida e pashent, un tempo liber cu nan por dedica na nan mes, un rato den nan bida rutinario.

Leon ta expresa cu esaki ta importante pa motibo cu e mantelzorg ta henter dia cu nan mayor of ser keri, y ta bon pa nan haya un ‘momento di relax’. “Nos kier evita cu di tanto stress cu nan tin, nan por haci algo cu nan no kier cu nan ser keri cu tin demencia.”

Na Cas Marie den bario, e pashent ta pasa cerca nan for di 8or di mainta te cu 12or di merdia. Locual nan ta purba haci cu nan cliente ta pa sali fuera di nan bario, bay un café pa bebe un koffie of cualkier otro actividad, ‘pasobra nan ta parti di nos comunidad’.

E ta bisa cu den comunidad tin e pensamento di limita persona cu demencia na cierto cos, ‘djis pasobra nan tin malesa’; sinembargo cu e guia y sosten cu nan tin rond nan por sigui haci’e. Cualkier persona cu tin ser keri cu demencia cu kier atende e actividad den bario, por subi riba rednan social di Cas Marie pa mas informacion. Tambe por yama Cas Marie Savaneta. Sea cu nan mester di Cas Marie mes of di actividad den bario.

E proyecto lo sigui pa henter aña. Na dialuna ta Paviljoen, Sonrisa Paradera riba diaranson y diabierna Tanki Leendert ‘nos ta saca nan pa haci e esfera diferente’.

E costo pa actividad pa cada dia tin cu paga 25 florin, pero si nan atende tur dia ta bira 75 florin y asina tur gasto ta wordo cubri. E famia, esun cu ta na cargo di e pashent cu demencia, tin cu acerca pa haci e pago.