Presidente interino di Venezuela, Juan Guaido, a designa diputado di Asamblea Nacional, Miguel Pizarro, como Comisionado Presidencial na Organisacion di Nacionnan Uni (ONU).

Ayera diadomingo, Guaido a informa cu e delegacion cu e lo manda na e di 74 Asamblea General di ONU, tin e mandato di cera acuerdo cu e lidernan principal di mundo, y tambe pa aumenta presion contra dictadura di Maduro. E delegacion na Nacionnan Uni lo ta encabesa pa Julio Borges; embahador na Merca, Carlos Vecchio y Miguel Pizarro.

Riba Twitter e presidente interino a señala cu e agenda lo inclui: e cumbre di e Grupo di Lima, un reunion cu e Grupo Internacional di Contacto, reunion di canciyernan di TIAR y reunion bilateral cu delegacion di varios estado. Tambe el a declara cu e delegacion lo tene reunion di trabao cu varios entidad pa loke ta trata emergencia humanitario, migracion y violacion di derecho humano.

Di otro banda, vice-presidente di e regimen, Delcy Rodríguez a indica diasabra pasa cu lo denuncia e supuesto vinculacion di Juan Guaido cu e grupo criminal Colombiano ‘Los Rastrojos’ na Nacionnan Uni, unda e lo hiba tambe mas di 13 miyon firma di ciudadano recogi contra e ‘blokeo’ di Merca contra e regimen.

Rodriguez lo biaha pa New York den representacion di e gobierno ‘de facto’ di Nicolas Maduro, hunto cu canciyer Jorge Arreaza den Asamblea General. Aunke mas di 50 pais no ta reconoce Maduro y su gobierno mas, Nacionnan Uni mester mantene pa su propio reglanan e reconocimento di su regimen como representante di estado Venezolano.

 

LEAVE A REPLY

Please enter your comment!
Please enter your name here