Rrelacion cu Venezuela… Kico haci cu Nicolas Maduro…

E siman aki cosnan importante lo ta tuma luga na e pais bisiña na otro banda di lama, unda lo bay re-instala un presidente pa un periodo di seis aña, sin cu un gran parti di e gobiernonan di mundo ta reconoce validez di su presidencia.

Nan no ta reconoce eleccion di 20 di mei 2018 cu a tuma lugar sin participacion di mayor parti di oposicion politico. Union Europeo, di cual Hulanda tambe ta forma parti, tampoco ta reconoce legitimidad di e eleccion den cual Nicolas Maduro a vence. Actualmente a bira conoci tambe cu Hulanda lo no reconoce Maduro como presidente legitimo. No ta conoci kico esaki lo bay significa pa e nivel di relacion diplomatico cu nan lo mantene cu estado Venezolano. Esaki por ta importante si, mirando cu tin bastante ciudadano Hulandes cu ta residencia na Venezuela, o ta den nan teritorio pa cualkier motibo, cu ademas por ta hende di e islanan aki, pues nos interes directo. Sigur si e situacion bira mas dificil ainda, ta necesario pa por atende e ciudadanonan ey.

Di otro banda, nos no mester keda straña si atrobe e regimen ta tuma medida pa loke ta exportacion di producto pa e islanan, manera a sucede na inicio di aña pasa. Si esey sucede, ‘que se asi’ pasobra na e altura aki ta bon pa duna un señal cla di unda nos ta para como nacion, cu no por aproba ni acepta e abuso grandi cu e ciudadano comun y coriente ta sufri na su pais. Simplemente no cuminsa lamenta cu e awacatinan no ta yegand, pero busca nan di otro caminda.

Sin embargo, nos tin mas asunto pa atende cu Venezuela. Esey ta e situacion di e refineria, cu ta leu di por cuminsa opera, si algun dia esaki bira realidad. Na maart venidero lo cumpli siete aña cu e refineria a cera, y na juni ta bay haci tres aña cu a firma un acuerdo cu un compania cu tin e palabra Citgo den su nomber, pero no tin un relacion directo huridico cu e compania Mericano cu ta doño di tres refineria na Merca, cu ta na e momento aki e ‘asset’ mas importante di e consorcio encabesa pa Pdvsa, cu no por haci nada sin instruccion explicito di su unico accionista, cu ta gobierno di Venezuela.

Den e actual situacion economico, unda tanto Pdvsa como estado Venezolano ta den e proceso di bay bao awa completamente den sentido financiero, ta dificil pa imagina cu nan ta capaz di haci algo positivo pa rehabilita e instalacionnan na Aruba. E plazo cu gobierno di Aruba ta duna ainda pa por presenta un plan di rehabilitacion lo no duna resultado, pasobra traha plan no ta e problema; esey ta e financiamento pa e proyecto. Esnan bon informa sa cu pa su proyectonan na Venezuela Pdvsa ta busca cooperacion di partnernan dudoso, pasobra nan no por acudi na e nombernan estableci den servicio sofistica den exploracion y explotacion di crudo y gas. Demas cu tin e aspecto cu mas tanto ta ignora, y esey ta cu e proyecto di rehabilitacion nunca a haya aprobacion di Asamblea Nacional di Venezuela, e mesun cu awe ta ser reconoci como e unico organismo estatal superior legitimo. Maduro no a haya importante pa e Asamblea, segun ley, aproba e proyecto, y lo por tin duda ta cerca ken finalmente nos mester deposita nos demanda, ora esnan cu a firma e contract cu Aruba, no por cumpli, loke ta parce di bira e realidad pronto tambe.

Otro aspecto ta e asunto di refugiado Venezolano, sigur un topico cu lo trata na e consulta parlamentario di Reino e siman aki na Sint Maarten, unda di banda Hulandes sigur lo entama e asunto di e mal trato cu e Venezolanonan den detencion na e islanan ta haya, segun diferente noticia den medionan Hulandes recientemente. Principalmente e trato di e personanan deteni na Curaçao a haya hopi critica, no pa e papel di e gobierno insular so, sino tambe e responsabilidad cu gobierno di Hulanda tin, a keda ampliamente critica.

Pa Aruba, aunke menos critica pa e maneho di esnan cu ta pidi asilo, y e trato di e detenidonan prome cu deportacion, esaki ta keda un punto importante, ya cu di un momento pa otro e tesis di gobierno Hulandes, cu ta trata di hende ilegal, y no di refugiado den e berdadero sentido di palabra, segun nan, no ta aplicable mas, sigur si den e lunanan nos dilanti e situacion na e pais bisiña bira mas caotico cu e ta awor caba.

Resumiendo tur esaki, nos ta kere cu e celebracion di un Nicolas Maduro cu ta huramenta e siman aki pa su segundo periodo como presidente, lo no tin mayor consecuencia pa nos pais, ainda. Su permanencia den poder no ta depende di e legitimidad cu tal o cual pais o gobierno ta expresa, sino di e hendenan arma cu e tin na su disposicion pa e represion riba su ciudadanonan. Nos por sigui e ehemplo di Peru, cu desde awor caba ta nenga entrada na e miembronan di e cupula di Maduro y nan famianan. O por ta cu tin cu a yega caba?

You May Also Like

Pakico na Corsou si un ministro ta tene honor na su mes?

Den tur e turbulencia di e ultimo dianan cu e situacion na Venezuela, y ...

Cosnan pa drecha…

Demasiado pa menciona; ban un pa un Ta hopi cos un gobierno nobo tin ...

Sistema bancario mester upgrade

Banconan comercial y CBA ta protagonista Aruba ta purba realisa un economia innova cu ...

Debate obstaculisa y sabotia

Diahuebs anochi Aruba por tabata testigo di un berguensa, ora cu e partido actualmente ...

Nos tambe kier un ombudsman sin djente?

Curaçao tin un asina… Djis un articulo casual den corant di ayera… Ministro na ...

Mas di 4 miyon den cinco aña… Pa un man yen di studiante

Nos ta custumbra caba cu riba e isla aki, kico cu un gobierno haci, ...