Compania Eagle LNG cu ta localisa na Houston Texas, USA ta bay construi un terminal di gas na nos pais. Un tremendo noticia pa nos digno pueblo mirando cu esaki ta un inversion grandi di 150 miyon dollar den nos economia. Desempleo ta halto na Aruba cu pandemia di coronavirus, cu nos ta bringa un aña caba. Mas aun e area di San Nicolas ta uno cu no tin actualmente actividad economico treciendo un ambiente menos progresivo. E proyecto aki lo crea aproximadamente 150 pa 200 cupo di trabou pa e proximo dos añanan cu lo cuminsa mas tarda na Juni 2021. Nos ta bayendo den bon direccion pasobra ta na December 2020 Quanten LLC a firma un Letter of Intent (LOI) cu Refineria di Aruba (RdA) pa opera nos refineria. Cu e deal nobo aki e terminal di LNG lo reemplasa heavy fuel oil tanto pa refineria como WEB N.V. cu den gobierno anterior a pasa den varios aventura pero nada no a wordo concretisa. Nos pueblo a sufri cu tarifanan halto di awa y coriente bao di e gobierno anterior cu e famoso contract di hedging y varios otro proyecto cu no a mira luz di dia. E terminal di gas lo fungi tambe como bunkering hub caminda tin posibilidad di habri un otro sector economico pa San Nicolas cu e industria di crucero cu ta usa gas y otro barconan. Lo exporta LNG gas den region y sigur esaki lo tin hopi mas beneficio economico agrega pa nos pais.  

Nos organisacion politico Movemento Electoral di Pueblo kier logra diversifica nos economia creando varios pilar economico nobo. Esaki lo garantisa un crecemento economico stabil y Inclusivo. Stimulacion di crecemento economico, cu e meta principal pa crea empleo, lo tin atencion maximo pa partido MEP. Desde cu nos a forma gobierno na 2017 nos meta tawata pa explora formanan di energia alternativo cu mester reduci gastonan di awa y coriente inmediatamente pero Aruba su man y pia tawata mara na e deal desastroso di Citgo. Gabinete Wever Croes a en camina un proceso transparente traves di Request for Expressions of Interest (REOI-1) y (REOI -2) cu na final RdA a cuminsa negocia cu Quanten LLC y Eagle LNG. Tankinan, refineria y gas ta tres proyecto separa cu mester duna fruta di un economia fuerte cu mester duna awa y coriente pagabel y trabao pa nos clase obrero y nos profesionalnan.

Nos ta para dilanti e posibilidad di un reapertura di nos refineria di Aruba,expande cu un facilidad pa Liquid Natural Gas (LNG). Cu e esfuerso aki di gobierno lo nifica progreso y desaroyo di un di dos pilar pa nos pais. E refineria tin un impacto directo riba nos economia. Den añanan 90, ex Lider di MEP Sr. Nelson Oduber a logra haya confianza di Sr. Oscar Wyatt pa habri e refineria bek bao di nomber di Aruba Coastal Refinery cu a inverti biyones di dollar pa upgrade e refineria. Durante e epoca aki alrededor di 775 persona tabata emplea directamente cu Coastal, mientras tabatin mas o menos 1.500 empleado di 70 diferente compania. Un boost economico tremendo pa districto di San Nicolas y Aruba completo. Actualmente Aruba ta depende riba un solo pilar economico, cu ta turismo, cu ta hopi vulnerabel na e momentonan aki, debi na e pandemia di Covid-19. Globalmente paisnan ta cera nan frontera pa purba mengua e efecto di contagio, mientras economia nan rond di mundo ta sufriendo bao di esaki. Aruba no ta un excepcion. Cu reapertura di nos refineria, Aruba lo tin un di dos pilar economico, cu lo duna mas stabilidad economico y baha e dependencia riba un solo pilar economico. Banda di esaki e gobierno di Wever Croes ta poniendo atencion riba desaroyo di mas pilar economico, mas chikito pero cu por wordo desaroya grandemente. Aruba ta ubica strategicamente y mester por haci uso di esaki pa logra desaroya mas pilar economico pa bienestar di nos digno pueblo.

LEAVE A REPLY

Please enter your comment!
Please enter your name here