(AFP) – Rusia a anuncia diaranson cu ta buscando aresto di fundador di Telegram, Pavel Durov tocante acusacionnan di “complicidad den terorismo”, alegando cu el a permiti pa usa e plataforma pa reclutamento den servicio di seguridad Ucraniano.
Naci na Rusia, Durov – un fundador serial di tecnologia cu a biba pafo di Rusia pa añas y tin paspoort Frances y Emirati – frecuentemente tabatin enfrentamento cu autoridadnan Ruso, mientras Moscu ta reforsa su control riba internet.
Su app di mensahe Telegram ta un di e plataformanan principal di comunicacion na e pais, y oficialnan ripitidamente a purba di blokea acceso of impedi su exito den un intento pa presiona Durov pa entrega data di usuario of pusha Rusonan pa usa un alternativa no-cifra sosteni pa estado.
Servicio di seguridad FSB a bisa cu a lansa procedura di buskeda internacional pa Durov, kende tambe ta CEO di Telegram. “A emiti un orden di buskeda internacional… pa cabesante di administracion di Telegram, P. Durov,” a bisa den un declaracion. No ta cla ki sorto di aviso a emiti y si otro pais of cuerponan di ley lo acepta of cumpli cune.
Abogadonan pa Durov, 41, a nenga di duna comentario na AFP. “Pavel Durov no ta desea di comenta na e etapa aki,” Telegram a bisa AFP.
Guera di rednan social
Moscu frecuentemente ta ataca enemigonan politico cu cargo di sostene “terorismo” of “extremismo,” incluyendo esnan cu a bandona e pais.
FSB a alega cu a usa Telegram como un plataforma di reclutamento pa servicio di seguridad Ucraniano. Ta bisa cu Telegram a faya den elimina un bot popular di cita cu, segun Moscu, ta ser usa pa servicio special Ucraniano pa atrae Rusonan jong “den actividadnan terorista y di sabotahe.”
Segun e declaracion, 46 ciudadano Ruso di 12 te 22 aña di edad cu a usa Leo Match Bot, cu ta prohibi na Rusia, a keda aresta desde juli 2025 pa ataca agentenan di ley y ehecuta actonan di sabotahe contra infrastructura di energia y transporte. Ta bisa cu agentenan di servicio special Ucraniano posando como muhe hoben a tuma contacto cu nan tur, y despues presiona nan pa ataca polis y pega infrastructura na candela.
Rusia y Ucrania a acusa otro di usa rednan social pa recluta hende pa sostene nan den e guera di cuatro aña y mey.
Durov, 41, a biba na Dubai y Francia.
Na 2024, el a keda aresta pa polis Frances pa cargonan relaciona cu distribucion di contenido ilegal, pero despues a sali liber bao fiansa. El a bandona Francia despues cu autoridadnan a elimina un prohibicion di biahe.
Naci na St. Petersburg – ciudad natal di presidente Vladimir Putin – Durov a funda VKontakte, un sitio di rednan social conoci ampliamente como “Facebook di Rusia.” Esencialmente a fors’e pa sali di e compania mientras el a cay bao presion di autoridadnan den mita di añanan 2010, y a funda Telegram, un plataforma di rednan social y mensahe priva.
Telegram rapidamente a bira un di e servicionan online mas usa na Rusia, y facilmente a frustra un intento di añas largo di autoridadnan di internet di Moscu pa blokea acceso paden di e pais.
Durov – kende ta activo riba Telegram – no a cometna inmediatamente tocante e acusacionnan di FSB.
E aña aki, VKontakte – awo controla pa estado y conoci como VK – ta pushando e app di mensahe cu sosten di gobierno, Max, urgiendo Rusonan pa cambia for di Telegram y WhatsApp.
Durov a critica e plataforma como “un app controla pa gobierno construi pa vigilancia y censura politico.”
