Santana ta e luga na unda e curpa di personanan cu a muri ta wordo dera; otronan ta deposita e shinishi den un luga special, esta cu ta wordo considera como un luga santo y special. Pero, esey no ta e caso di tur santana.

Recoriendo algun luganan di e isla, reportero di Bon Dia Aruba a haya un extra atencion di e Santana di districto San Nicolas, na unda lector por a mira riba e potretnan aki cu ta un luga hopi leu di ta algo santo y special.

Cahanan di morto a wordo habri, grafnan cu pa via di tempo a deteriora y algun di nan tin basta tempo of hasta añanan asina den estado deplorabel. E porta principal di e santana aki ta keda habri na unda por aprecia un mal holo, malesa halto, un cantidad di sushi cu a wordo tira den entrada y te hasta por sirbi pa haci otro tipo di actividadnan, como bruheria.

Cruznan y kransnan bieu tira riba vloer, na unda tampoco tin camindanan pa cana sino malesa, asina ta e ta e panorama tristo di e santana aki, na unda ta supone di ta un luga na unda comunidad di San Nicolas ta dera y hiba e ultimo restonan di nan ser keri.

Ya cu San Nicolas ta un di e areanan cu a wordo menciona durante campaña di eleccion, ta pidi pa diferente instancianan, gobierno nobo, candidatonan cu a wordo scogi pa comunidad y autoridadnan, pa pone un tiki di atencion riba e santana aki, di un comunidad cu tambe ta exigi y cu tambe tin derecho di haya un santana digno pa nan habitantenan.