Scol di Musica Rufo Wever ta presentando un siman di concierto

E siman aki Scol di Musica Rufo Wever a organisa un siman di concierto na unda tanto e maestronan como e alumnonan ta duna un concierto di instrument. Maestro di musica na Scol di Musica Rufo Wever, Sr. Carlos Bislip, a conta un poco di e siman di concierto aki.

Bislip a indica cu e siman aki scol di musica a organisa un siman yena cu diferente concierto. Algo diferente cu añanan anterior e scol di musica tabata haci un concierto grandi den e sala grandi di Cas di Cultura, pero e biaha aki a opta pa cada dia un grupo di maestro haci nan presentacion.

Bislip a splica cu e motibo pakico a scoge pa haciele diferente e aña aki ta pasobra ora cu haci un concierto grandi e muchanan cu ta toca no ta hopi, por ta e maestronan ta pone un of dos mucha toca. Cu e concepto nobo aki di un concierto cada dia cada maestro por pone mas mucha toca. “Esey ta algo cu e mayornan gusta mas pasobra nan yiunan ta toca mas cu un cantica,” Bislip a remarca.

Pa loke ta e conciertonan, Bislip a conta cu e siman di concierto a cuminsa for di dialuna dia 6 di juni caba cu concierto di violin y guitara, ayera dia 7 di juni a toca turno na dos maestro di piano cu instrumentnan pa mucha. Awe diahuebs tin concierto di maestro di cuarta hunto cu e coro di mucha, cual ta cay den e ambiente mas tipico, mas folkotico y diabierna 9 di juni otro maestro di piano ta duna concierto, pero esaki ta bay ta enfoca mas den e ritmo di jazz y e otro maestronan di piano tambe lo presenta cu e parti folklorico.

E ultimo dia di e siman di concierto aki, ta diasabra 10 di juni y ta toca turno na concierto di e maestronan Franklin Granadillo hunto cu Bislip. Granadillo ta presenta cu su instrument di brass y Bislip ta bay toca percusion.

Durante siman e conciertonan ta cuminsa pa 5or di atardi y riba e ultimo dia diasabra 10 di juni e evento ta cuminsa pa 3or di atardi. E conciertonan ta tuma luga den sala chikito di Cas di cultura. Pa entrada pa concierto por yama na 582-2888 of por pasa na Scol di Musica Rufo Wever.

Scol di Musica Rufo Wever ta extende su invitacion na pueblo di Aruba pa pasa y disfruta di e concierto di musica presenta pa e maestro- y alumnonan di Scol di Musica Rufo Wever.