Ayera tardi SKOA a manda un comunicado pa informa cu Scol Preparatorio Nos Paraiso, Maria Goretti College y Colegio Pastoor Kranwinkel lo permanece cera probablemente te dialuna.
E decision aki a cay pa motibo cu nan mester haci mantencion na e scolnan pa causa di e huma produci pa e dump na Tamarijn. Den caso cu nan no ta keda cla prome cu dialuna, esaki lo wordo notifica debidamente. SKOA cu ta e fundacion encarga cu e scolnan catolico a informa tambe cu e toets pa HAVO/zesde klas lo tuma luga normal.
Ayera Bon Dia Aruba a bishita dos di e scolnan afecta y nan situacion tabata practicamente similar. Angeline Leung ta directora di Colegio Pastoor Kranwinkel kende a bisa cu e situacion a surgi for di dialuna caba ora cu nan a haya problema hopi fuerte di e huma; y ayera mainta mesun situacion tambe. El a describi cu ora nan a yega tempran ayera e scol tabata bou e huma; te hasta e klasnan cu airco tabata presenta mesun problema. Tabatin docente cu a bira malo y tambe muchanan cu a keha di dolor di cabes. Nan a manda e muchanan cas unabes cu nan a constata cu e situacion no tabata saludabel caba. Nan a cuminsa avisa e mayornan pa wanta e muchanan na cas te ora cu ee situacion ta normalisa.
Nan tin 306 alumno den e scol aki, y asina nan a confronta e problema nan a yama SKOA pa asina evalua e situacion entre otro cu Brandweer. Ora cu a constata cu e situacion no tabata esun ideal pa laga e muchanan na scol a wordo canalisa cu e minister di Enseñansa cu finalmente a tuma e decision pa manda e muchanan na cas.
Maria Goretti College
Magda de Hasseth-Roos kende ta cabesante di Maria Goretti College ta bisa cu mirando e molester di e huma a adopta e decision pa e muchanan bay cas, ya cu e huma tabata molestia for di un dia prome e muchanan y e docentenan ainda. “Na prome luga semper nos ta wak salud y bienestar di nos alumnonan y nos maestronan.”
E scol aki ta consisti di dos parti, Maria Goretti Paradera y Maria Goretti Ayo. Na Paradera nan tin 10 klas y na Ayo nan tin dos base klas. Pero esun di Paradera ta esun cu a haya e residuo di e huma cu e consecuencianan cu e muchanan tabata haya iritacion di wowo, garganta y problema cu rosea, etc.. Varios mucha y docentenan a confronta e problema aki.
Tabatin mayor bibando den e bario afecta cu e huma cu nan mes a dicidi di no manda e muchanan na scol, mirando e situacion cu a presenta. Mientras otro mayor a hiba nan te hasta algun di nan a keha pasobra decision no a wordo tuma tempran pa laga e muchanan na cas. Sinembargo un decision asina no ta depende di e cabesante di scol sino cu e tin henter un procedura. Nan mester wordo consulta prome cu SKOA y conhuntamente cu esunnan concerni e decision ta keda finalmente den man di e minister di Enseñansa si tin scol si of no.
