DCIM110GOPROG2471349.

E colornan spectacular di e Rif Mesoamericano ta na peligro y por bira blanco y muri, victima di un otro enfermedad cu tin cientificonan na careda pa haya un solucion: ‘Stony Coral Tissue Loss Disease (SCTLD).

Den algo mas cu un aña, Caribe Mexicano a perde mas di 30% di su coral na un enfermedad poco comprendi te awor, yama SCTLD, cu ta causa cu nan ta calcifica y muri.

Expertonan ta adverti cu e enfermedad por mata un gran parti di e Rif Mesoamericano, un magnifico fenomeno natural di mas di 1.000 kilometro di coral, comparti pa Mexico, Belize, Guatemala y Honduras.

SCTLD a pone e region den panico y e por potencialmente devasta turismo alrededor di e rif, e di dos mas grandi na mundo despues di e Great Barrier Reef di Australia. Ta muy probable cu demasiado turismo ta aportando na e problema, segun cientificonan.

SCTLD, cu tabata infectando coral dilanti costa di Florida tambe desde 2014, a keda detecta den Caribe Mexicano na juli aña pasa, cerca di e punta mas den norte di e rif.

Desde e tempo ey el a plama como 400 kilometro den direccion sur, yegando Belize y causando mas perdida di coral cu den e 40 añanan anterior den e region, di acuerdo cu e grupo ambiental Healthy Reefs for Healthy People.

E enfermedad mester di solamente poco siman pa mata e material di e coral cu a tuma deceda pa crece, asina Melina Soto, e coordinador di e organisacion na Mexico, ta conta. “Si nos sigui na e ritmo aki, e ecosistema aki ta bay collapse den proximo cinco pa dies aña,” el a conta.

Al borde di extincion

Cientificonan ta bisa cu SCTLD ta hasta mas peligroso cu ‘coral bleaching’, otro enfermedad cu a afecta rif di coral rond mundo, incluyendo e Great Barrier Reef.

Bleaching ta sucede ora tin cambio ambiental, manera temperatura di oceano cu ta subi, cu ta causa cu coral, cu ta colonia di animal chikito, ta saca e alganan microscopico conoci como ‘zooxanthellae’ cu ta biba den nan y cu ta duna nan nan colornan briyante. Un rif por recupera di bleaching si e ambiente recupera na tempo, pero SCTLD ta letal.

“E ta un descomposicion completo di e tejido di coral, cu ta muri y ta laga un skelet blanco atras,” Claudia Padilla ta bisa, cu ta un cientifico na CRIP Puerto Morelos, un centro di investigacion di biologia marino na Mexico su peninsula di Yucatan. Pa e wowo sin practica, e impacto d e enfermedad no ta asina visible ainda.

“Nan tabata parce mi maraviyoso. Mi no lo a pensa nunca cu nan ta muriendo, manera e expertonan ta bisa,” Emanuel Fernandez, di 34 aña, un ingeniero kimico di Argentina, a comenta despues di un tour di snorkel na costa di Cancun, e resort di mas famoso di e region.

Sin embargo, e impacto ta mas cu visible pa expertonan. “Bo tabata custumbra bay bucea y mira e colonianan di coral prosperando aki. Awor nan tur ta morto,” Padilla ta bisa.

25 di e 40 especienan di coral di e region a keda afecta, e ta bisa. Di eseynan, tres ta al borde di extincion den e region. Investigadornan ta actualmente trahando riba un banco di DNA pa coral na peligro di extincion, sperando cu algun dia nan lo por trece nan den naturalesa atrobe si ta necesario.

Demasiado turismo?

Cientificonan ta den un careda contra tempo pa comprende kico ta causando SCTLD. Un prome sospechoso ta mal calidad di awa, causa pa awa di desperdicio cu ta bay den lama y un reciente aumento drastico di e cantidad di sargazo den descomposicion, otro emergencia ambiental den e region. Otro aparente factor lo ta e kimiconan relaciona cu sunscreen cu turista ta usa, cu awor a keda prohibi pa autoridadnan.

“Varios estudio ta indica cu un particulo haya den sunscreen, oxybenzone, ta impedi e reproduccion di coral,” Christopher Gonzalez, director regional di comision di parkenan nacional, ta bisa.

E luna aki, autoridadnan a cera temporalmente tres seccion di e rif, Palancar, Colombia y El Cielo, cu ta ricibi miles di bishitante pa aña.

Awor gobierno, industria turistico y residentenan ta forsa pa haya un ekilibrio delicado: un nivel di turismo cu no lo mata ni e rif, ni economia.

Alrededor di 725.000 turista a bishita e rifnan di Caribe Mexicano e aña aki , e mesun cantidad compara cu añanan anterior. “Si nos perde e rif, nos ta perde nos actividad principal: turismo,” Maria del Carmen Garcia, hefe di Parke Nacional di Rif di Coral na Puerto Morelos, ta adverti.

 

LEAVE A REPLY

Please enter your comment!
Please enter your name here