Sean Connery, e actor Escoces carismatico kende a bira un superstrea internacional como e agente secreto suave, James Bond y despues a bandona e rol pa crea un carera ganador di Oscar como otro personahenan, a fayece. E tabatin 90 aña di edad.

Esposa y dos yiu homber di Connery a bisa cu el a ‘fayece pacificamente den su soño rondona pa famia’ na Bahamas, unda e tabata biba. Yiu Jason Connery a bisa cu su tata tabata ‘malo pa algun tempo’.

Productornan di Bond, Michael G. Wilson y Barbara Broccoli a bisa cu nan tabata ‘devasta’ pa e noticia. Nan a bisa cu e representacion ‘real y inteligente di e agente secreto sexy y carismatico’ di Connery tabata en gran parti responsabel pa e exito di e serie di pelicula.

“E tabata y semper lo ser recorda como e James Bond original kende su entrada den historia di cinema a cuminsa ora el a anuncia e palabranan inolvidabel – ‘E nomber ta Bond… James Bond’”, nan a bisa den un declaracion.

Daniel Craig, e Bond actual, a bisa cu Connery ‘a defini un era y un estilo’ y cu e ‘inteligencia y carisma cu el a refleha riba pantaya por a midie den mega watts’.

Prome minister Escoces, Nicola Sturgeon a bisa cu e pais tabata den duelo pa ‘un di su yiunan mas stima’.

Connery tabata un presencia dominante riba pantaya pa alrededor di 40 aña. E tabata den comienso di su 30 aña di edad y poco conoci na momento cu el a bira strea di e prome thriller di Bond, ‘Dr. No’ na 1962, basa riba e novela di Ian Fleming.

Connery a continua como Bond den ‘From Russia Wil Love’, ‘Goldfinger’, ‘Thunderball’, ‘You Only Live Twice’ y ‘Diamonds Are Forever’, hopi biaha ehecutando su propio

Na momento cu el a retira como Bond cu 41 aña di edad, Hollywood a predeci e fin di Connery. Pero el a proba nan tur fout, interpretando un variedad di personahenan y probando di ta adepto den comedia, aventura of drama. Edad solamente a eleva e atraccion di su mirada y estilo; el a pone un record di celebridadnan ora cu na edad di 59 el a ser nombra e ‘homber mas sexy na bida’ di revista People.

El a gana e amor di fanaticonan di frankisia ‘Indiana Jones’ ora el a interpreta tata di Indy hunto cu Harrison Ford den e tercer peligula na 1989, ‘Indiana Jones and the Last Crusade’.

Connery a gana su Oscar pa actor di sosten na 1987 pa su interpretacion di un polis na Chicago den ‘The Untouchables’.

Maske e peliculanan 007 a hacie un miyonario, Connery hopi biaha a purba di separa su propio personalidad for di esun di Bond. “Obviamente ami no ta Bond”, el a yega di bisa. “Y Bond obviamente no ta un ser humano. Flemming a invent’e despues di e guera, tempo cu hende tabata hambra pa luho, gourmet, exotico. Esey tabata e cosnan di cual e Inglesnan tabata stima di lesa despues di e escacez den guera.”

E ‘berdadero’ Connery tabatin un prome matrimonio problematico y un historia di comentarionan hustificando violencia domestico. Na 1962 el a casa cu Diane Cilento, pero e relacion a termina na 1974. Su impacto a dura pa largo, cu Cilento acusando Connery di abuso fisico, mientras Connery a defende su comportamento den entrevistanan. Na 1965, el a bisa revista Playboy cu e no a haya ‘nada particularmente malo cu dal un muhe – maske mi no ta recomenda hacie den mesun forma cu bo lo dal un homber. Un sla cu man habri ta hustifica – si tur otro alternativa a faya y a duna suficiente advertencia.”

Connery a ricibi critica amplio, pero toch a ricibi cantidad di honor, manera ser scogi como comandante di Orden di Arte y Literatura di Francia, y un honorario di Kennedy Center na 1999. E siguiente aña Reina Elizabeth II a proclam’e un cabayero Britanico pa su servicionan na drama di pelicula.

Na 2005 a scog’e pa un premio ‘lifetime achievement’ di Instituto Americano di Pelicula.

Mientras su rolnan di actuacion a disminui ora el a alcansa edad di 70 aña, Connery a pasa hopi di su tempo na Lynford Cay na Bahamas. El a hunga golf casi tur mainta, hopi biaha cu su esposa. Na 2007 el a anuncia su retiro, rechasando e oportunidad di actua den otro pelicula di ‘Indiana Jones’.

A pesar di biba den exterior pa hopi aña, Connery tabata un sostenedor apasiona di independencia Escoces, un donador na Partido Nacional Escoces, y a pone un tattoo di e palabranan ‘Scotland Forever’ riba su brasa. Sturgeon, lider di SNP y prome minister Escoces, a bisa cu ‘Sean tabata un leyenda global, pero prome cu tur cos, e tabata un Escoces orguyoso y patriota’.

Connery ta laga atras su esposa, ruman Neil y yiunan Jason y Stefan. Su publicista, Nancy Seltzer a bisa cu lo tin un ceremonia priva sigui pa un servicio memorial unabes cu e pandemia di coronavirus termina.

 

LEAVE A REPLY

Please enter your comment!
Please enter your name here