AP_337673714684.jpg

E ciudad capital di Francia, esta Paris ta wordo considera e destinacion turistico mas importante di mundo. Miyones di turista ta bishita e ciudad aki, ya sea pa disfruta di e sitionan cultural mas atractivo di nan manera Museo di Louvre, Kasteel di Versailles y Toren Eiffel. Pero ayera un siman pasa un serie di atentado terorista a laga mas cu shen morto y cantidad di hendenan herida, creando un ambiente di panico y luto na Francia y un impacto economico grandi cerca nan. E situacion aki ta ilustra nos con sensitivo industria turistico ta. 
Sector turistico

Despues di e atakenan aki, e mirada di tur inversionista tabata ariba e sector turistico y mas ainda riba e companianan aereo. E grupo Europeo mas grandi di compania aereo a sinti di biaha e efecto aki: Air France-KLM a baha casi 6%, Lufthansa a cay 1.8% y aerolinea IAG cual ta cubri Iberia, Brithis Airways, Vueling y Aer Lingus a cay 2.6%. Di otro banda e sector hotelero tambe a mustra un caida di 4.7 na cuminsamento di siman. Aunke despues a recupera cu 1.5%. Ta logico cu e atakenan aki lo afecta e demanda aereo. Aunke su impacto no lo ta asina grandi manera e famoso 9/11 na Merca, caminda e avionnan a wordo uza manera arma pa comete e atentadonan aki. Asina un rapport di e grupo analista economico Bloomberg Intelligence a indica: “Den e momento aya e operacion di e compania aereo a cay hooi mes. Nan mester a reduci e capacidad pa por maneha e tiki demanda den mercado”. 

Despues di e atentadonan na Paris, e agencia  Mericano ta paga tino riba dos mercado exterior: E vuelonan entre Asia y Europa y e vuelo nan entre Merca y Europa. Pasobra ademas di e efecto negativo di e atentadonan; tin otro impacto hopi negativo debi cu Euro ta perdiendo balor. Analisando e diferente grupo di aerolinea, e analistanan economico ta kere cu e impacto mas grandi lo ta riba e aerolinea Frances-Hulandes, esta Air France – KLM.  Despues e di dos mas afecta ta e Aleman Lufthansa. Aunke e situacion aki ta yega na un momento unda e petroleo ta hopi barata -40 dollar pa bari— loke tabatin e sector di aerolinea bon para. Tambe mester tene na cuenta cu e tempo den cual e atake nan a sosode ta haci e impacto menos pisa. “Un caida den trafico aereo y den entrada di divisa durante e di tres kwartaal di aña, no ta asina impactante cu si esaki lo a tuma luga na zomer, unda e biahamento di hende ta den su punto mas halto” asina e grupo analista Bloomberg a bisa. Industria turistico. E sector di turismo di Francia lo por mira un golpi grandi debi cu Presidente Fracois Hollande a anuncia un plan pa introduci un estado di emergencia na henter e pais durante e proximo tres luna nan. Francia ta wordo considera e destino turistico mas importante di mundo pasobra e ta trece mas cu 80 miyon bishitante cada aña. Turismo ta sostene casi 10% di tur empleo na Francia sea directo of indirectamente. Paris ta ricibi 32 miyon bishitante, y si ta existi un estado di emergencia ta logico cu esey ta bay afecta e turismo. E hende por ta preocupa pa e toke di keda y cu e reglanan pa espacio publico lo por limita nan plannan di vakantie. 

 

LEAVE A REPLY

Please enter your comment!
Please enter your name here