Un homber condena di secuestra rapper Tekashi 6ix9ine a ricibi sentencia di 24 aña den prison diaranson, na man di un hues cu a cita su rol lider den un gang activo na nivel nacional.

Hues Paul A. Engelmayer a anuncia e sentencia pa Anthony Ellison di 33 aña di edad, kende tabata cera den un prison federal na Manhattan.

Durante un procedura di dos ora, e hues repetidamente a cita e secuestro na juli 2018 di Tekashi 6ix9ine y e hecho cu Ellison a corta e cara di otro homber, lagando e permanentemente desfigura.

Engelmayer a yama Ellison ‘cruel y vicioso’ pa ‘corta cara di un persona’ maske e persona no tabata involucra den un tiramento pa cual Ellison tabata buscando vengansa.

Fiscalnan a bisa den un documento por escrito entrega na corte cu e atake a laga e homber cu un cicatriz for di su horea te su cachete, un lesion asina mahos cu abogadonan di Ellison tabata exitoso pa no laga e hurado mira cierto imagen.

Fiscalnan a bisa cu Ellison tabata un lider di un faccion violento di Nine Trey Gangsta Bloods.

“Mi no ta un angel pero mi no ta un monster”, Ellison a bisa e hues. “Mi tin fayonan. Mi ta un humano.”

Despues di su propio aresto, Tekashi 6ix9ine – kende su nomber legal ta Daniel Hernandez – a declara culpabilidad y a bira un colaborador.

Na e huicio di Ellison aña pasa, e rapper a testigua tocante su participacion cu e gang. El a describi e secuestro, bisando cu Ellison y otro homber a fors’e subi un auto horta usando un arma di candela. El a bisa cu e hombernan a core rond cune, parando algun biaha pa batie mientras e tabata suplica pa su bida.

Finalmente e hombernan a hib’e na su cas na Brooklyn, unda nan a horta henter un saco di joyas prome cu hib’e algun caya leu y lag’e den libertad, el a bisa.

Na 2018, Tekashi 6ix9ine tabatin un cantica multiplatino, ‘Fefe’, cu Nicki Minaj, cual a alcansa number 3 riba e charts di pop, y ‘Stoopid’ cu Bobby Shmurda, un rapper den prison.

Na april, Tekashi 6ix9ine a cuminsa cumpli un sentencia di aresto domiciliario pa e ultimo cuatro luna di un sentencia di dos aña den prison cu el a ricibi pa su rol den un tiramento na New York cu el a haci tempo cu e tabata cu e gang. Algun siman despues el a lansa e video nobo, ‘Gooba’.

LEAVE A REPLY

Please enter your comment!
Please enter your name here