Diasabra anochi e comunidad Ecuatoriano na Aruba a conmemora e di 210 aniversario di independencia di nan pais natal.

Pa duna contenido na e fecha historico di dia 10 di augustus di 1809, cu ta wordo considera e inicio di independencia di Ecuador, e Consul Honorario di e pais aki na Aruba, Magali Guzman de Meza a organisa un Santo Sacrificio di Misa na Misa Birgen di Fatima na Dakota.

E acto religioso aki a conta cu presencia di Presidente di Parlamento Juan (Ady) Thijsen, Minister di Husticia, Siguridad y Integracion, Andin Bikker, miembronan di Cuerpo Consular di Aruba, comunidad Ecuatoriano y invitadonan den general.

Durante su discurso, Guzman de Meza a declara cu nan a reuni den cas di Señor pa stempel cu su bendicion divino e progreso di nos comunidad. Pero alabes e integracion di nan comunidad cu e gran famia Arubano, pa nan por sigui contribui cu e crecemento y desaroyo di e bunita isla di Aruba, cual nan ta considera nan hogar.

Guzman de Meza a referi na e acontecimento historico cu a marca nan independencia y tambe na e curashi y dedicacion di nan heroenan cu a funda nan nacion ‘cu balornan di libertad y igualdad.’

Esaki ta e prome biaha cu e comunidad aki, di alrededor di 500 Ecuatoriano, ta celebra oficialmente nan dia nacional na Aruba. Nan representante diplomatico a declara cu na Aruba nan ta recorda cu orguyo e herencia cu nan heroenan di independencia a laga pa nan. “Herencia di un espirito balente y luchado pa e balornan di libertad y igualdad.”

Igualmente el a bisa cu ‘cada migrante Ecuatoriano ta un embahador di nos pais’. Ademas cu nan comunidad ta uno chikito pero fuerte na Aruba, y nan ta wordo reconoci pa nan fe, dedicacion na trabou y amor pa nan famia. “Tur esaki a permiti nos por cana ariba e caminda dificil di e migrantenan semper mirando pa futuro…”

El a trece dilanti cu hopi di e comunidad Ecuatoriano na Aruba tin mas cu 20 aña pafo di nan pais. Pero a pesar di e distancia, nan ta continua uni pa e stimacion cu nan ta sinti pa nan pais stima, Ecuador. Na final, Guzman de Meza a manda palabra di pabien na Ecuador y su pueblo den cuadro di nan dia nacional.

 

 

LEAVE A REPLY

Please enter your comment!
Please enter your name here