Minister Otmar Oduber a declara na prensa cu su ministerio ta dirigiendo un carta den direccion di e compania EcoGas e siman aki. Den e carta aki nan kier mustra e compania ariba e asunto di exportacion di sushi tambe.
E mandatario a indica cu e compania aki tabata consciente cu gobierno tabata trahando riba un plan integral pa maneho di desperdicio. Ya cu EcoGas tambe a participa den e destaho publico debi cu e compania a cumpra e ‘bestek.’ Den dje a wordo mustra cu lo bin un ley caminda mester tin un permiso pa un compania por exporta sushi. E ta haya cu e negoshi di EcoGas no tabata pa exporta sino di separa sushi y pa produci gas y bende esaki cu WEB, pero segun e mandatario- e proyecto aki a fracasa.
E mandatario a indica cu EcoGas ta un compania cu gobierno ta respeta y cu e no tin nada personal contra e empresarionan tras di dje. Un compania estableci na Aruba y cu ta haci otro tipo di negoshi riba nos pais.
“Aki no tin nada personal pa cu propietarionan, al contrario, mi tin un aprecio y reconocimento pa e trabou cu nan a haci na Aruba durante añanan” el a bisa. Sinembargo e ta haya cu si e compania ta haci algo robes y nan no ta tuma e bienestar di pueblo di Aruba den general, como gobierno nan mester para fuerte pa esaki.
Durante e conferencia di prensa e mandatario a exhibi algun imagen pa demostra cu e compania no tabata hibando un maneho responsabel riba maneho di desperdicio. E ta lamenta pa haci e denuncia aki publicamente, pero e ta haya cu si ta wordo exigi deber, tambe mester cumpli cu responsabilidad. “Un bon comerciante no ta haci esey y nos ta para nan,” el a bisa.
