Pa ex Minister di Infrastructura y actual Parlamentario, Benny Sevinger, e proyecto pa bin un incinerador grandi ta uno PPP (Private Public Partnership). Esaki contrario na loke Minister di Infrastructura, Otmar Oduber a yega di declara, esta cu absolutamente e proyecto di incinerator no ta uno PPP. Sino cu e proyecto aki – den cuadro di maneho di sushi y desperdicio – lo wordo realisa y opera pa un compania priva, y cu gobierno no lo inverti niun cen den dje.

Pero Sevinger ta sigura cu e proyecto ta uno PPP, mirando e documento cu nan por a bin haya riba ‘supuesto destaho’ rond di incinerador y procesamento di sushi. “Si bo ta mira den e documento aki, berdaderamente nos ta papiando di un proyecto PPP”, Sevinger a bisa.

Aunke –segun e Parlamentario di oposicion– nan no ta hayando cerca nan documentonan di e minister concerni. Sinembargo diamars ultimo nan por a haya un parti di e documentonan relaciona cu e destaho, cual el a revisa ‘ariba ariba’. A base di esaki, e Parlamentario di oposicion a bin cu un serie di pregunta, unda e ta pone den duda e intencion tras di e proyecto aki cu Oduber a cuminsa cana.

Den e documento aki –segun Sevinger– e minister ta papiando di un proyecto PPP. Y un pregunta cu el a formula tin di haci cu actualmente tin un protocol firma cu Hulanda, unda gobierno di Aruba a bay di acuerdo pa no sigui haci mas proyecto PPP, ya cu esaki ta bay costa nos pueblo mas: “Con por ta cu e minister aki si a haya autorisacion pa haci un proyecto PPP?”

Segun Sevinger, e proyecto aki ta bay costa hopi mas cu por ehempel e renobacion y expansion di hospital. Ya cu e proyecto di incinerador lo ta alrededor di 200 pa 300 miyon dollar. Ademas, contrario na loke e mandatario a papia di 10 pa 15 aña, Sevinger a referi cu e proyecto PPP aki ta bay pa 20 aña, unda nos ta bay ‘lease’ e proyecto aki.

Pues e Parlamentario ta haya cu dependiendo di e prijs cu e proyecto lo sali, nos ta papiando entre 50 pa 80 miyon florin pa aña, cu mester paga pa 20 aña. “Binti aña ta loke el a pone!”, segun e Parlamentario.

Igualmente el a agrega cu den e documento ta para cu 20 aña tambe WEB tin cu bay tuma e coriente for di e planta nobo aki. E ta puntra: Cuanto WEB ta bay paga pa kilowatt uur pa e coriente cu e compania priva ta bay entrega?

Actualmente nos ta pagando –segun Sevinger– alrededor di 0.9 cen pa kilowatt uur pa e coriente produci pa WEB cu ayudo di e molinanan di biento y e panelnan solar.

Den su declaracion, Minister di Infrastructura a bisa claramente cu tin un prijs stipula y cu esaki no lo tin su impacto riba aumento di prijs. Ya cu logicamente WEB nunca lo cumpr’e na un prijs mas caro di loke ta cost’e pa produci coriente cu fuel oil.

Sinembargo, Sevinger uzando tambe su logica ta indica cu si e compania priva cu lo entrega coriente pa WEB tin cu saca su ganashi entre 40 pa 50 miyon pa aña, bo ta puntra bo mes: Cuanto WEB tin cu paga pa e coriente aki? Pero e ta haya cu na final, tur e costo aki ta wordo hinca den e prijs di coriente cu nos tur como consumidor tin cu paga.

Sevinger a bin cu mas pregunta a base di e documento cu nan a haya relaciona cu e destaho di e incinerador grandi. E ta indica cu e documento di e destaho ta wordo garantisa cu e compania lo haya tur sushi di Aruba, cu ta alrededor di 80 mil ton anual, y proximamente e mandatario lo bin cu cambio di ley pa facilita esaki. Mientras cu recientemente, di forma oficial a habri un centro di reciclahe pa Serlimar. Tanten den e documento ta poni cu lo duna tur e sushi aki y te hasta mas na e compania cu lo opera e incinerador grandi. Pues aki mester algun aclaracion di e minister concerni.

 

 

 

 

LEAVE A REPLY

Please enter your comment!
Please enter your name here