Parlamentario di oposicion Jennifer Arends-Reyes (AVP), kende ta miembro di Comision di Turismo den parlamento, a referi riba algun belasting cu gobierno lo kier introduci pa genera mas entrada y atende cu e gastonan di presupuesto 2020.

Arends-Reyes a expresa su preocupacion riba con costoso nos pais a bira pa nos turistanan, mientras cu nos bishitantenan kier haya mas balor riba loke nan ta gasta riba nos isla. Pa 2020 Gobierno a presupuesta 15 miyon mas na entrada di Tourism Levy, pues esaki lo bira 7% pa tur turista stay-over y no ta descarta cu pa turismo crucero tambe lo aumenta e fee.

El a bisa cu no solamente e peso fiscal aki tin di haci cu sector turistico. Ya cu tin 111 miyon florin cu ta presupuesta pa 2020. El a bisa cu ainda nan no tin un bista di e presupuesto 2020, pero a base di e lista cu e Colegio di Supervision Financiero (CAft) a yega di traha, eynan nan por sa loke gobierno kier trece aden como entrada. E cifra di 111 miyon florin, gobierno mester saca for di comunidad di Aruba y tambe di nos turistanan.

Segun e parlamentario, gobierno ainda no tin e base legal pa introduci e medidanan pa genera e entrada aki. Sinembargo pa loke ta trata e parti di turismo, atrobe nos por a wak cu nan ta bay aumenta impuesto. Pero e ta haya cu mester tene cuenta riba locual ta e experiencia, ya cu por ehempel nos por tin un tremendo aeropuerto y tambe otro tipo di facilidadnan mas moderno. Pero si e hendenan no ta contento y nos comunidad no ta satisfecho, esaki ta bay tin impacto riba e calidad di nos producto turistico. “Ta e calidad cu e turistanan ta exigi pa locual nan ta paga,” el a declara na e matutino aki.

Menos turista crucero

 

Arends-Reyes tambe a referi na caida di entrada pa loke ta trata turismo crucero. Pa locual ta trata crucero, mirando cu nos ta ricibiendo barconan cu cantidad grandi di pasahero y mega ships, ya Aruba ta cuminsa conta cu cierto cantidad di entrada den temporadanan, y si tin cancelacion, e impacto pa nos economia ta sinti’e mes ora. P’esey e ta haya cu mester percura pa reserva un bon mix di barco.

El a bisa cu pa temporada di zomer cuminsando fin di april, tin un cancelacion hopi grandi. Pa e temporada aki ta spera 25 calls menos di Pullmantur, cu a cancela. E barco crucero aki tin un capacidad di 2,700 pasahero cada biaha, loke ta nifica un caida den e temporada aki di 70 mil pasahero cu a cay afo. E caida aki ta nifica alrededor di 8 miyon florin menos den nos economia. E cantidad aki – segun e parlamentario di oposicion – tabata plania pa bin Aruba, pero a wordo cancela.