Recientemente Partido RED Democratico a tene un conferencia durante cual nan a elabora ariba diferente topico importante den actualidad. Un di e topiconan importante aki ta e costo di bida halto cu tin aworaki na Aruba. Lider di e partido, Ricardo Croes, a elabora ariba e tema aki y a trece e partido su preocupacionnan pa dilanti.

Croes a expresa cu for di punto di bista ta increibel ora cu un persona mester drenta cualkier luga pa cumpra cualkier cos, sea ta paña of comestibel, y e prijsnan a subi den un forma cu practicamente ta impagabel.

El a remarca cu mayoria hende na Aruba tin nan cas, auto of diferente otro cos a base di un hipoteca of un prestamo na banco. E aumento di costo di bida esaki ta nifica cu ora fin di luna yega hopi hende mester stretch nan salario den un forma of otro pa wak con ta logra cubri tur e obligacionnan aki.

“Tin hopi famia cu tin mas cu un yiu y mas cu un yiu awendia ta practicamente un necesidad na un pais cu ta vergrijs manera nos pais. Pero con bo por haci cria un famia di mas cu un yiu cu salario abao. Bo no por press comerciantenan tampoco pasobra e costo di haci negoshi ta haltisimo, impuesto ta haltisimo, etc. pero na final ken ta paga pa tur cos? E ciudadanonan,” el a enfatisa.

El a señala cu “gobernantenan sin niun vision, sin niun conocemento drechi y contra tur conseho” a introduci sistemanan di impuesto, entre otro BBO na frontera, cu ta sigui subi di un forma acumulativo sin cu tin ningun manera pa stop esaki.

El a agrega cu for di 2005 caba e partido a introduci e tempo ey, prome cu BBO, un BTW cu si, segun el a remarca, a wordo aplica esaki di forma cu el a wordo presenta, awendia no lo tin e problemanan cu tin aworaki, mayoria vincula na costo di bida halto.

Croes a sigui splica cu banda di tur e gastonan diario y mensual cu tin pa paga, aworaki scol ta bay habri. El a resalta cu no ta un secreto cu tur aña ora cu scol ta bay habri famianan ta ser confronta cu e gasto astronomico di uniform, di materialnan escolar y di schoolgeld, dependiendo di cual scol un mucha ta bay, y tur esaki hunto no ta baha bao di mil florin.

“Imagina bo un persona cu tin dos yiu, pero e mes tin un entrada di tres mil florin, belastbaar. Y e un luna ey e ta hay’e confronta cu e gasto ey siendo cu ya durante henter aña caba e ta bezig ta stretch su florin, stretch su florin wak pa e duna sikiera e basico den alimentacion na su famia. Con e ta bay haci e luna ki?,” el a apunta.

El a remarca cu gobierno no tin un plan y gobierno no ta haciendo nada pa ningun hende, cu excepcion cu ariba red social partido MEP ta coriendo un campaña di rifa di 500 florin pa material di scol y 300 florin pa uniform. “Mi ta bisa waw, esaki ta unico cos cu partido MEP por a ripara cu ta haci falta? Den nan casnan no tin mas gasto relaciona cu scol?,” el a agrega.

Croes a señala cu e tempo cu Sr. Lampe tabata minister di enseñansa den e gabinete anterior, el a haci diferente maniobra, entre otro kita e rente di studiantenan, aloca mas placa pa normbedrag, bin cu diferente formanan nobo pa hobennan por educa nan mes etc.

Pero e gobierno actual, el a subraya, ta un gobierno nobo cu en bes di ta un gobierno cu ta continua ta un gobierno “a base di politica mediocre caminda un minister ta presta su mes pa entre otro desbarata, bay contra tur conseho, kibra tur trabao djis pa haci politica.”

El a sigui recorda cu tempo Sr. Lampe tabata maneha ministerio di enseñansa no solamente el a mustra vision, entre otro con pa baha e gastonan door di aloca e placa miho, maneha e placa miho, kita caminda mester kita, haci investigacion y hiba e personanan cu a comete corupcion y fraude dilanti.

Pero cu esaki, el a enfatisa, e Partido Red Democratico a mustra cu nan tin e capacidad no solamente di ta visionario con pa maneha enseñansa riba su mes, si no con pa maneha e placa di pueblo y haci’e mas rendabel y haci e area di enseñansa mas eficiente.

Esaki, Croes a resalta, ta algo cu den su punto di bista mester wordo aplica den tur ministerio, sin excepcion di ningun ministerio. “E ta indispensabel pa bo ta visionario, pa bo ta eficiente, pa bo tin respet pa e placa di pueblo y papiando di placa di pueblo e ta indispensabel pa bo tene cuenta cu e derechonan constitucional. Nos derechonan fundamental riba nivel internacional ta coriendo peliger,” el a destaca.

Por ultimo el a remarca cu e ta spera cu pueblo di Aruba realisa cu ta indispensabel pa nan bira mas consciente politicamente. “Si di berdad bo kier mira un cambio, si di berdad bo kier pa e pais aki bay dilanti, si di berdad bo kier mira un otro pilar economico, si di berdad bo kier mira cu educacion no ta algo pa yiu di rico so, pero si no pa bo yiu tambe.”

El a agrega cu for di su punto di bista ta straño cu gobernantenan ta bin dilanti indicando cu tur cos ta bon y cu e pais ta recuperando bon. “Mi kier sa ta nan ta recuperando bon, personalmente, pasobra nan si ta aloca nan hendenan den lugarnan strategico pa garantisa, entre otro, cu nan tin un control ariba locual nan mester tin un control riba dje,” el a subraya.