SEPB ta aclara caso di fraude na EPB Oranjestad

Esaki ta un comunicado textual di SEPB, sin adaptacion pa redaccion di Bon Dia Aruba:

Directiva Fundacion Educacion Basico Profesional (SEPB) a tuma nota di speculacionnan cu tin andando relaciona cu e fraude cu a tuma luga na EPB Oranjestad. Directiva a duna tur espacio pa e investigacion por a tuma luga sin ningun intervencion. Directiva ta di opinion cu Pueblo mester sa kico a tuma luga realmente y a scoge pa awor duna informacion publicamente.

Directiva a haya informacion na luna di october 2017 di un posibel fraude door di e ex directora di EPB Oranjestad kende a caba di baha cu pensioen. Mes ora Directiva a cuminsa un proceso di investigacion interno. Basa riba prome resultado na luna di november 2017 y reconociendo e complehidad di e investigacion rekeri, entre otro facturanan falsifica, checknan dudoso, gran cantidad di datonan digital, Directiva a contrata un compania di servicio ‘forensico’/investigacion criminal profesional riba tereno di accounting. Directiva di SEPB di prome momento cu e fraude a yega na su conocemento a sigui e procedura usual y a informa Minister encarga cu Enseñansa y departamentonan gubernamental concerni.

E compania specialisa forensico hopi lihe na luna di november 2017 a confirma cu fraude a wordo cometi na gran escala y na e momento ey Directiva a duna instruccion pa profundisa mas den e caso/investigacion. Locual a resalta ta e forma sofistica cu e fraude a sosode door di entre otro haci mal uzo di confiansa di entre otro personal di e organisacion. E compania contrata a haya suficiente prueba pa Directiva por a entama un caso civil y entrega keho penal contra e ex directora di EPB Oranjestad. Na luna di juni 2018 Directiva a informa personal di e organisacion di e fraude den liñanan grandi, pa no stroba e investigacion andando.

Basa riba e experencia y acontecimento adicional cu e caso di fraude aki a duna Directiva, Directiva a cuminsa e proceso pa mehora y fortifica diferente proceso administrativo y financiero cu ayudo di expertonan den e ramo. Un di e consecuencianan tambe ta cu otro personal (administrativo y di maneho) a haya medidanan disciplinario di Directiva aunke nan no a beneficia personalmente di e fraude y cu nan a actua di buena fe/confiansa den e directora. Al contrario na loke a wordo publica den prensa den e ultimo dianan.

Otro consecuencia di e caso di fraude ta cu Directiva di SEPB a bay corte pa termina relacion di trabou cu e directora general di SEPB. Esaki considerando cu su persona a nenga structuralmente di atende cu Directiva riba su responsabilidadnan y posibel fayonan relaciona cu e fraude. Na december 2018 juez a dicta sentencia na fabor di Directiva di SEPB.

Directiva a haci denuncia penal na luna di juni 2018 na Landsrecherche simultaneamente cu esun entrega door di e Minister encarga cu Enseñansa y despues cu e rapport forensico a sali definitivamente. E denuncianan aki ainda ta den tratamento. Directiva ta mantene contacto estrecho cu oficina di Minister y cu Minister di Enseñansa referente e pasonan cu a ser tuma y ainda falta pa tuma pa fortifica e organisacion mas ainda.

Directiva ta lamenta e fraude constata y tin tur comprension pa e frustracion di trahadornan di SEPB y di comunidad cu fondonan publico pa enseñansa profesional a wordo malversa. Nos ta consciente di e sla duro cu esaki ta nifica pa educacion profesional na Aruba, specialmente considerando e inversionan cu ta necesario pa sigui desaroya educacion profesional aun mas.

Sinembargo manera ya informa Directiva di SEPB ta tumando e pasonan necesario pa evita algo semehante ripiti den futuro. Por ultimo Directiva di SEPB ta apela na comunidad y gobierno pa sigui duna sosten na un forma positivo na mehoracion di educacion profesional basico na Aruba.

Nota: Potreta ta cortesia di ArubaNative.Com.

 

You May Also Like

tumberito.jpg

Ganadonan di Tumberito Festival 2016

Resultado Tumberito Festival 2016: CATEGORIA INFANTIL: Ganadora: Sendy Loefstop – Cantica: Mi Ta Cla ...

casino ex aurora reunion

‘Operado nobo casino ex Aurora ta tuma tur 44 trahado den servicio bek’

  Minister Paul Croes (AVP) di Labor a anuncia cu otro siman lo firma ...

Sindicato STA ta anuncia paro completo na Arubus

Diego de Cuba di Sindicato di Trahadonan Arubano (STA) ta confirma na Bon Dia ...

WEB: A surgi un solucion pa e welga di tres dia

Awe finalmente a bin un solucion despues cu e trahadonan di WEB a rechasa ...

aruba boat trip.jpg

Aruba Boat Trip cu ambiente riba lama henter dia

Awe durante henter dia Aruba Boat Trip a tuma luga den lama na Nikky ...

parlamento gobernador.jpg

Mandatarionan ainda ta diferencia riba kico a pasa cu nombramento gobernador

Mientras Prome Minister Mike Eman a contesta preguntanan ayera den parlamento di Aruba, minister ...