Departamento di Salud Publico (DVG) ta indica cu e proyeccionnan pa aworaki na nivel mundial ta cu paisnan lo yega na un pik basta halto di casonan positivo pa Covid-19, na unda cu Aruba te ainda no a yega na e pik di e ola actual cu ta e number cinco.

Asina Sharline Koolman di DVG a manifesta ayera unda a declara cu variante Delta compara cu e virus di Covid-19 original tabata 1.9% mas infeccioso y Omicron tin mas o menos e mesun cantidad di infeccion, por ehemplo, si a haya 500 caso di e virus original por haya 1.000 mas di Delta y 2.000 di Omicron.

For di cluster geel, Koolman a bisa cu nan ta espera cu mas pashent lo bay yega e siman aki of otro siman probablemente na hospital manera Dr. Caceres tambe a menciona siman pasa, e mayoria di pashentnan cu ta yega na hospital no a vacuna te ainda of no ta completamente vacuna.

Pa evita cu personanan lo yega na e situacion aki, Koolman a señala cu mester haya e dos prome vacuna asina como tambe e booster shoot, un otro problema cu ta existi na nivel mundial ta cu cierto paisnan como por ehemplo, Israel ta bayendo pa su di cuater vacuna, pero mundo completo no ta bon vacuna ainda, tin paisnan cu tin 7% di nan poblacion so cu ta vacuna y esey ta causa cu bo ta bay keda haya variantenan y tanten cu e esey lo sigui asina paisnan mester sigui bringa cu e situacion.

Ta p’esey cu e ta haci suplica pa comunidad lo sigui vacuna, cifranan na hospital na e momentonan aki ta yuda den sentido cu hospital por sigui duna cuido cu algun tempo no por a wordo duna pa motibo di Covid.

E proyeccion cu nan tin aworaki ta indica cu nan no ta espera cu e casonan lo cuminsa baha y e virus lo disparce.

Di loke ta trata e regla di cuarentena cu a ser adapta siman pasa, ta asina cu variante Omicron cu ta menos agresivo den esunnan cu ta vacuna y door di discusionnan cu nan tabatin den cluster geel nan a dicidi di haci cambio den esaki , for di e prome dia cu e persona ta haya sintoma tin cu isola su mes, ora e persona ta haya e resultado positivo di PCR test, e mesun dia ey ta conta cinco dia pa por sali for di isolacion si no tin sintomanan.

Den caso cu cinco dianan a pasa y e persona ainda tin sintomanan, mester tuma contacto cu DVG na unda e persona lo haya instruccionnan.

Tambe, el a solicita na comunidad cu ora nan ta haya e cita pa bay test center na Hospital pa nan por asisti na e ora y dia cu e persona tin afspraak pa motibo cu tin personanan cu a acudi un of dos dia despues y esey a crea un problema hopi grandi pa Hospital.

Personanan cu ta biba den e mesun cas cu esun cu a sali positivo pa Covid tambe mester keda cinco dia den cuarentena na unda cu si nan no ta presenta sintomanan e ultimo dia nan tambe por sali afo.

Koolman tambe a menciona cu contact tracing di epidemiologia ta wordo usa pa haya informacion, como por ehemplo, di unda e contagio ta bin, aworaki pandemia di Covid ta birando un endemia y for di e momento ey e maneho ta bay cambia pa motibo cu ya nan por sa di unda ta bin y ken ta infecta, asina mes, el a indica cu eynan ya no lo inverti asina tanto tempo y tanto placa den personal pa sinta y warda di un e contagio ta biniendo, e contact tracing a ser minimalisa pa e simpel motibo cu e no ta dunando mas data.

Tocante e cluster di casonan positivo, Bon Dia Aruba a puntra si esey a bin for di e medidanan implementa na unda cu na un restaurant e cantidad di persona ta limita pero na casnan por tin e libertad di reuni 60 persona den un reunion familiar, pa cu esaki Koolman a señala cu den un di e puntonan tin personanan como hobennan cu a bin di afo cu ta bin cu otro hende y e parti ey tambe ta hunga un rol, pero e momento cu nan yega Aruba y nan ta mantene nan mes na e reglanan ta evita esey, ademas el a señala cu “nos no a haci e contact tracing asina intensivo mas, pero di lo cual nos a saca afo te siman pasa tabata cu mas tanto contagio tabata ainda den clubnan nocturno, esey tabata esun cu hende a meld mas tanto” el a sigura.

Den e mesun conferencia aki a bin dilanti cu turistanan cu ta drenta na isla na unda cu algun di nan ta bin Aruba sin un prueba di test y nan ta test ora nan ta yega aeropuerto, e maneho aki ta aplica pa algun paisnan so, esunnan cu no tin riesgo halto pa Covid, pa loke ta trata crucero, si tin turistanan cu a test positivo, esey ta nifica cu nan no por baha for di e crucero na unda cu pa esey tin otro maneho diferente, ademas si 1% di e crew di crucero a sali positivo e barco no por drenta na Aruba.