Shete persona a fayece den un accidente di helicopter. Investigado di aviacion di Bahamas ta trahando pa determina kico a causa e accidente, cual a costa bida di 7 ciudadano Mericano.
Ningun di e curpa rescata a ser identifica, pero agente policial Shanta Knowles a informa AP cu e biyonario Chris Cline y su yiu muhe tabata entre e fayecidonan. E grupo di Mericano di Big Grand Cay a faya pa yega Fort Lauderdale ora tabata spera nan.
Cline tabata un biyonario di industria di carbon y un gran donante pa politico republicano. Jaime Nixon, un analista di aviacion pa departamento di investigacion pa accidente aereo di Bahamas, a bisa cu un barco specialisa di Florida lo bin cu gran ekipo pa saca e helicopter for di awa.
Autoridad di aviacion civil di Bahamas a bisa e administracion federal di aviacion cu a localisa e helicopter Augusta AW 139 den awa pa 7or di anochi. Polis na Bahamas a bisa cu a hiba 7 curpa na e capital Nassau pa identificacion oficial.
Den un declaracion di Polis Real di Bahamas a bisa cu e incidente ta bou investigacion. No a identifica tur e fayecidonan, pero a nota cu ta cuater hende muhe y tres hende homber, incluyendo Cline y su yiu.
