Home Editorial Si cambia ley no ta dificil, pakico nos no ta haci un...

Si cambia ley no ta dificil, pakico nos no ta haci un miho trabao anto?

196

Dos suceso algun tempo pasa a capta nos atencion, pasobra nan ta relaciona cu e facilidad, o dificultad di crea o cambia ley den nos pais. Tur dos caso, na nan manera, ta ilustra locual ta aparenta di ta ineptitud o incapacidad pa analisa y crea reglanan legal cu ta ‘make sense’ y no ta aumenta e problema na luga di yuda resolve.

Un di nan ta e caso di e problemanan cu e rijbewijs di Aruba, cu segun opinion di Conseho Electoral no tabata cumpli cu ley, o bisa di otro forma, e ley no ta refleha e rekisitonan cu e rijbewijs mester/ta pretende di tin. Ademas e set up pa produccion di e rijbewijs tin cierto riesgo (innecesario) cune, cu por coregi cu relativo facilidad, pero pa un of otro motibo esey no ta sucede. Den esaki nos ta referi na e 1500 rijbewijsnan cu ta circulando cu eror ariba, sea den nomber di e personanan, o otro informacion manera fecha di nacemento. Esaki ta djis e casonan cu a constata a base di e ‘sample’ cu Censo a haya di Cuerpo Policial di un parti di e rijbewijsnan otorga na 2016. Si desde 2015 ta di e manera aki a traha, anto tin probabilidad cu tin miles di rijbewijs cu eror ariba, cu ta haci e documento no valido. Realmente tur hende cu detecta eror riba nan rijbewijs otorga desde 2015 mester bay reclama un documento nobo; paga pa e documento nobo den nos opinion no ta al caso, pasobra ta e servicio gubernamental ta responsabel pa entrega un documento cu tin balor legal.

Pero awor e aspecto di legislacion den esaki. Ora Conseho Electoral a emiti un comunicado di prensa, den cual nan a splica extensamente kico ta e problema cu e decreto actual no ta coresponde cu e rijbewijs, e ministro encarga cu e asunto, esun di Husticia di e tempo ey, a comenta negativamente riba e noticia, alegando cu no tin problema cu e rijbewijs. Despues, ora el a comprende finalmente cu si tin problema, y cu e mester haci algo, el a sali afo bisa cu e cambio di e decreto no ta algo grave, ‘den un dia mes por cambi’e’. Esey riba su mes ta bon noticia, pasobra nos no ta custumbra cu e tipo di velocidad aki na departamento di legislacion. Puntra pa su opinion riba e reaccion di e ministro, e presidente (saliente) di conseho electoral a bisa na un emisora radial, cu “si e (ministro) ta bisa cu e ta un cos cu por haci den un dia mes, ta dicon anto e no a hacie ainda…”

Nos no a tende un reaccion riba e comentario aki di banda di e ministro, y probablemente lo no hay’e tampoco. Djis nos ta curioso pa sa ta con largo esun dia ey na cual e ta referi, lo bay dura. Y loke ta bay dura mas largo ainda ta e orden na e servicio cu ta emiti rijbewijs pa nan cuminsa traha cu dato confiabel di database di Censo.

E otro caso tabata e discurso di comerciante y ex-presidente di ATIA, Stephen Daal, na e evento por cierto bon bishita pa empresa chikito organisa pa departamento di asunto economico. E empresario invita, cu gran experiencia den logistica, a ‘pinpoint’ cu precision e mal experiencia cu gobernacion ta creando y lo sigui crea pa comercio, si no cambia algo drastico den e manera cu gobernacion ta mira comercio. Y con seguidamente no ta maneha legislacion pa regula y stimula sino pa ta un obstaculo pa comercio, obligando nan di haci mas gasto (innecesario) haciendo e producto cu ta yega Aruba mas caro, y hasta disminuyendo e posibel entradanan pa gobierno mes. Hopi critica acerta, y esaki tambe ta, ta mustra den direccion di e lentitud legendario den haci cambio den ley. Esey tin varios factor cu ta hunga un papel, di cual varios a ser analisa den e editorial aki. Un di esunnan cardinal ta e falta di interes na nivel mas halto den gobierno pa activamente actualisa ley como instrumento importante pa trabao gubernamental. Ademas cu ta carece e vision pa realisa unda legislacion por sirbi di estimulo, na luga di ta un strobacion, pa desaroyo economico. Den e caso specifico di logistica, y tur cos cu nos ta uza y bisti ta bin di exterior, no ta mirando mehoracion.

Tambe te awe ainda ta parce cu den gobernacion no tin e comprension cu procesonan fluido y agil no ta stimula corupcion. Corupcion ta bin di procesonan dificil y intransparente cu ta haci bida di comerciante dificil, y como tal tambe e disposicion pa na un dado momento ‘resolve e problema’ cu placa o fabor. Ningun hende cu mester tramita asunto cu un entidad gubernamental y ta haya un servicio corecto y rapido, lo ta hinca den su cabes pa paga pa servicio cu mester ta gratis, y rapido. En todo caso lo ta un alivio si e gobierno actual realmente kier haci un diferencia, pa cuminsa traha riba un trayecto drechi di legislacion, y di berdad ‘haci den un dia loke (facilmente) por haci den un dia…”