Parlamentario Marlon Sneek a entrega un carta na Presidente di e organo legislativo aki, Juan Thijsen pidiendo un reunion publico cu Minister di Enseñansa, Rudy Lampe. Nan kier atende e diferente preocupacion di e docentenan riba tereno di enseñansa.

El a referi cu siman pasa un manifestacion di docentenan organisa pa SEPPA y SIMAR a entrega un manifiesto na Vice-presidente di Parlamento, Allan Howell y te ainda nan no a haya contesta. Mientras ta existi un incertidumbre riba kico lo bay pasa ora cu aña escolar nobo ta habri.

Segun e lider di fraccion di AVP, den e manifiesto entrega, e docentenan kier pa e Minister di Enseñansa baha bay. E no ta haya cu e carta ta papia di baha gobierno y tampoco di Gabinete Wever-Croes, pero si di Minister di Enseñansa cu, den nan concepto, e mester bay.

El a bisa cu recientemente tabatin un encuentro (bijeenkomst), pero e tipo di reunion aki no ta esun mas adecua pa atende e incertidumbre den enseñansa. Mientras cu den un Reunion Publico (Openbare Vergadering) nan por bin cu mocion y duna e minister indicacion tambe. Mientras cu den un encuentro, nan no por haci esaki.

Esaki ta e di tres carta cu e fraccion berde ta manda pa Presidente di Parlamento, ya cu nan no ta hayando contesta pa honra nan peticion di bin cu e reunion publico aki, segun parlamentario Sneek. E ta spera cu nan por haya un contesta pronto riba nan peticion.

Traimerdia
Igualmente, e no ta haya corecto e forma cu gobierno a atende cu e problema na Traimerdia, caminda nan a sak’e for di Ministerio di Enseñansa y re ubica den Ministerio di Asunto Social. E ta haya cu nan haci manera cu si gobierno ta tratando cu un snack-bar, caminda un ta bende pastechi y otro cerbes.

Parlamentario Sneek a bisa cu pa ley, Minister Rudy Lampe ta responsabel di Traimerdia. El a agrega cu no ta den Conseho di Minister e cambio aki ta wordo legalisa. E ta haya cu pa ley ta wordo exigi un reunion publico pa asina duna e Minister di Asunto Social e autoridad pa atende cu Traimerdia. Ya cu Minister Lampe ta esun cu ta keda responsabel legalmente pa cada un di e decisionnan aki.

Ya cu prome cu e tipo di cambio aki tuma luga, nan mester a bin Parlamento pa cambia e ley, y esey e, como Parlamentario, no a mira pasa. Aunke Parlamento a drenta den reces, parlamentario Sneek a bisa cu su fraccion, esta e nuebe Parlamentarionan di AVP, ta disponibel pa realisa e reunion aki pronto. Solamente mester di 3 parlamentario mas pa tin quorum, ya cu nan ta considera cu esaki ta algo importante pa pais Aruba. El a argumenta cu e ocasionnan cu no tabatin quorum, ya cu nan miembro tabata ausente ta debi na falta di respet den nan direccion, y esaki nan no ta acepta.

E ta haya cu un cantidad di cos controversial ta tumando luga rond di Ministerio di Enseñansa. E ta haya cu e cambio aki nan a hacie pura, djis pa tene e maestronan trankil. Pues mirando cu e proceso di cambio di Traimerdia di un cartera pa otro cartera ministerial ta un gañamento, e ta considera esaki inaceptabel. Ya cu nos tin ley, y gobierno tin cu respeta e ley aki.

 

LEAVE A REPLY

Please enter your comment!
Please enter your name here