Ayera mainta IBiSA a informa cu nan a habri e registracion pa e di 41 edicion di e careda Turibana Loop 2021 e cual nan a enfatisa cu lo sigui cu tur medidanan di prevencion.

Asina a informa William Erasmus ken ta fungi como hefe suplente di deporte y movecion caminda cu esaki lo tuma luga dia 12 di september venidero 6or di mainta na bario di Noord saliendo for di MFA.

El a aclaria cu mirando cu e casonan positivo pa Covid-19 ta aumenta dia pa dia nan ta keda pendiente di kico lo por pasa den dianan aki na unda cu cambionan lo por presenta of medidanan mas estricto por wordo implementa.

“Nos ta volg loke ta sosodiendo y nos ta haciendo nos best pa bin cu algo pa e comunidad di Aruba por haci deporte di e manera mas sigur posibel” Erasmus a declara.

Tambe a bisa cu esaki ta un careda grandi cu 1.000 participante na unda cu coredonan individual local por inscribi cu 25 florin, pa coredo internacional tin un costo di 20 dollar y pa ekipo relay ta 50 florin, di loke ta trata e distancia, el a confirma cu ta e mesun cu añanan anterior di 10.5 kilometer pa individual y 10.5 kilometer pa ekipo relay na unda cu e distancia aki ta wordo parti den dos persona.

E registracion a cuminsa ayera mes riba e website www.turibanaloop.com segun el a sigura na unda cu e persona mester paga online of dirigi na IBiSA pa paga y asina por sigura e participacion den e careda aki, dia 3 di september ta ultimo dia pa inscribi of te momento e careda lo keda sold out.

E premiacion ta pa e prome 3 ganado absoluto y den categoria masculino y femenino di 17-19, 20-29, 30-34, 35-39, 40-44, 45-49, 50-54, 55-59 y 60+.

E competencia den ekipo ta 50 florin pa 2 persona y e premiacion ta pa e prome 3 cu pasa e finish den duo masculino y femenino y duo mix. IBiSA ta bay tin un detaye pa e prome 300 participante paga.

Pago por wordo inscribi online cu un credit card na momento di registra/inscribi, tambe por haci esaki for di dialuna 23 di augustus na IBiSA Playa y San Nicolas for 8or di mainta pa 12or di merdia y 1or di atardi pa 4or di atardi. IBiSA ta bay tin dianan special ariba diahuebs y diabierna dia 26 – 27 di augustus y 2 – 3 di september for di 8or mainta pa 6or atardi ‘non stop’ y esaki ta solamente na ‘cash payment’.

Erasmus a menciona cu door cu nan no por haci caredanan den ultimo tempo esaki ta un bon oportunidad pa esunnan cu kier participa y kier sigui haci movecion.

Rafael Perez coordinado deportivo dik IBiSA a comenta cu door di e situacion di Covid-19 e aña aki no lo tin e careda di mucha pero pa ekiponan relay lo tin un luga di registracion na MFA di Noord unda cu e dia di e careda lo mester registra prome cu 5or y mey di mainta, esaki ta pa motibo cu manera Perez a bisa lo tin un bus disponibel cu lo sali 5or y mey pa hiba e persona cu lo core e di dos pida di e careda na e punto di relay.

Pa finalisa, tur participante sea esunnan individual of ekiponan lo ricibi un tshirt, Bib number, medaya, esakinan mester wordo busca diahuebs y diabierna dia 9 y 10 di september for di 8or di mainta pa 6or di atardi ‘non stop’ na IBiSA Playa.