E siman aki ta priminti di bira uno importante pa nos isla. E por ta importante pa continuacion/solucion di e conflicto entre ministronan cu tin gobierno “tranca”, pa usa palabra di nos promer ministro mes. Mientras tanto a bira conoci cu en todo caso esey lo no ta desde awe, pasobra ministro encarga cu Infrastructura no a yega di Hulanda ainda, y esey ta haci cu e intento di intermediacion di promer ministro no por tuma lugar tampoco.

Di e manera aki lo no tin un decision o solucion den e conflicto menciona, loke segun gobierno mes lo resulta den continuacion di e ‘trancazo’ cu tin den su seno, pa cual nan no por tuma ningun decision di peso. Esey ta lanta pregunta con ta para anto cu e tratamento den reunion d Conseho di Ministro di Reino diabierna venidero di e eventual acuerdonan na cual Aruba y Hulanda mester yega pa por facilita e prestamonan necesario pa apoya sector priva.

Promer ministro den e rueda di prensa ayera nochi a indica cu Aruba y Hulanda a cana un caminda diferente cu e dos otro islanan, di manera cu no lo ta asina urgente pa tin un contesta cla pa diabierna. Nos no sa sigur cu esey ta asina; lo mester tin pa diabierna un acuerdo riba puntonan principal. Di tur manera, gobierno ta declara cu lo tin finanzas pa cubri e compromisonan pa augustus di entre otro loonsubsidie, ademas cu a bira conoci cu gobierno a logra haya 80 miyon florin riba mercado local na ‘treasury bills’ cu ta caduca cada tres luna. A duna e comentario acerca cu esey no ta nada straño y cu gobierno tin varios aña ta fia placa di e manera aki a corto plazo. Esey ta berdad pero por observa cu ultimo añanan e sumanan cu ta fia di e manera aki a aumenta, loke no ta un bon señal, pasobra di tur manera e ta aumento di debe, mientras bo capacidad di paga a disminui.

En todo caso, lo ta un ilusion pa pensa cu nos por sobrevivi financieramente di e manera aki, pasobra e sumanan grandi cu nos mester ainda pa e aña aki, y posiblemente pa otro aña tambe, lo mester bin di Hulanda. Pues di tur manera lo mester yega na un acuerdo pronto, manera varios gremio empresarial a urgi caba, y esey no sin base, pasobra e parti di nos empresanan cu ta depende di subsidio di salario ta considerable, ademas cu e mero duracion largo di e crisis aki ta haci cu lo tin empresa cu no tin e ‘rosea’ largo necesario pa sobrevivi. Problema pa paga salario no ta unico problema cu ta presenta. Asina ta cu, sigur tumando na cuenta cu e crisis por dura pa hopi tempo ainda, y tambe cu e situacion na Merca ta indica cu no por spera un pronto recuperacion di nan economia, nos mester rescata mas tanto posible di nos economia sin por conta cu un recuperacion completo, pasobra esey lo no tuma lugar promer cu nos partner economico mas importante ta ‘back in business’.

Pa bolbe awor na e conflicto den e ‘junior partner’ den coalicion, nos por a tuma nota di un aceleracion ayera den e investigacion unda e lider di partido ta e sospechoso principal. Esey ta pone mas presion ainda riba esnan cu ta apoy’e y ta duna mas credibilidad ainda na loke e ministro disidente a trece dilanti den parlamento. Di e manera aki ta bin mas presion atrobe riba e situacion politico,unda no tin opcion facial ni agradable. E junior partner no por acepta e ministro mas den e mesun posicion, pero mester ta consciente cu logra su salida lo no ta un victoria. Nan lo keda cu man bashi, pasobra haya e puesto di ministro pa nan manda un mucha manda bay haci loke e ministro disidente no kier a haci, ta parce imposible cu e postura cu e ‘senior partner’ den e gabinete a asumi awor, esta cu no ta bay tin un ministro nobo mas den e periodo di gobernacion aki. Atrobe ta bin dilanti e opcion di laga gobierno cay, cu ironicamente ta bin awor den un situacion mas desfaborable ainda pa esnan cu tabatin esaki den mente. E factor cu ta haci esey mas dificil ainda ta e recaida den e situacion di e coronavirus. No ta cuestion cu nos mester coregi e situacion di crisis ey, sino cu den e caso aki nos tin un recomendacion pa no biaha di nos partner economico mas importante, cu despues nos lo mester convence pa kita esaki atrobe. Den e sentido aki no ta un cuestion di simplemente atende e crisis di salud nobo aki riba su mes, pero e tin su consecuencianan economico tambe. Y ta net esey nos no mester awor, e ta pospone nos recuperacion considerablemente.

Y asina nos ta bolbe atrobe na e conflicto politico, cu ta parce cada vez mas ridiculo y insignificante compara cu e otro asuntonan cu nos tin pa deal cu nan. Y atrobe ta bin dilanti e mesun consideracionnan di par di siman pasa: esun cu kier baha gobierno den e condicionnan aki, ta comete suicidio politico. Nos por tin eleccion na november 2020, si mester, pero probablemente lo bira september 2021.

 

 

LEAVE A REPLY

Please enter your comment!
Please enter your name here