Simar: ‘Mester un helpdesk pa docente cu tin dificultad cu plataforma digital’

Den e momentonan actual dificil, enseñansa tambe ta confrontando cierto problema. Sindicato di maestro SIMAR a duna di conoce cu tin docentenan a confronta cu e situacion cu mester haci un cambio pa plataforma digital diripiente.

Presidente di e sindicato, Josephine Albertus a duna di conoce cu e cambio na plataforma digital no ta mesun facil pa tur docente. Esaki pa motibo cu no tur tin e mesun conocemento, ta mesun lihe, of tin mesun habilidad pa traha cu diferente plataforma.

Cu e plataformanan disponibel, Albertus a bisa cu mester duna un guia pa uzo di esakinan, mirando cu mayoria di docente ta custuma di ‘skirbi cu krijt’ y hopi no sa con pa upload of busca informacion di un buki digital. “Sin guia ta bira dificil.”

E ta bisa cu tin algun scol a purba duna guia, pero no ta mesun facil pa tur hende. Si nan subi un plataforma pa haya splicacion of un handbook cu por duna guia, pero esaki no ta algo cu ta brinda na e docentenan.

Pa por duna enseñansa digital, tin cu bin cu guia adecua pa esaki. Albertus ta bisa cu na otro paisnan, docentenan a haya guia profesional pa esunnan cu no tin habilidad digital por atende cu plataforma online.

El a expresa cu tin helpdesk den diferente area, manera psicologo, caminda por yama y ricibi yudansa. Pero e parti di enseñansa no tin un helpdesk na unda e docente por subi of yama of WhatsApp pa haya e guia necesario pa por sigui, ‘pa tin mas facilidad pa e maestro’.

Den algun caso, e docente mester haci uzo di su computer of smartphone pa upload of download nan documento, pero tambe nan yiunan tin mester di e aparatonan pa scol. E ta bira un situacion hopi fastioso, ya cu e docente no por bay scol pa busca buki of material pa duna les.

Albertus ta bisa cu algun docente mester guia, pasobra di un dia pa otro a haci cambio y e docentenan tabata custuma na algo otro. Pues e mensahe cu nan tin ta cu nan ta compronde e situacion di crisis, e ta fastioso pa enseñansa.

“Nos ta compronde y nos kier pa enseñansa sigui, pero nos no por keda tradicional y traha digital sin guia. Mester por guia e docente pa yama of subi pa haya ayudo con pa traha of haci uzo di un plataforma manera mester ta”, el a splica.