Den dianan aki Sindicato di Maestronan di Aruba (SIMAR) ta bin hayando cierto kehonan y inkietud tocante e situacion na EPI, di esaki, su presidente Josephine Albertus a papia cu Bon Dia Aruba pa asina duna un poco mas di informacion.

Ta asina cu Albertus a señala cu maestronan y mayornan preocupa a acerca na SIMAR unda cu nan kier haya mas informacion amplio di minister di Enseñansa Endy Croes y Directie Onderwijs caminda el a compronde cu EPI a bin cu cambionan na ultimo momento y esey ta nifica cu cierto mucha ta ser perhudica.

“Si nos ta bisa cu e alumno ta central, esey no por ta, pero e ora ey nos tin cu wak tambe kico tur tin su tras”, el a comenta.

Di mesun manera Albertus a informa cu el a tuma contacto cu director di EPI, esta Ryan Maduro, pero Albertus no a logra papia cune te ayera atardi unda e ta pidiendo un bista di kico ta pasando cu e meta principal cu ni un mucha no ser perhudica, ta p’esey cu nan ta bay analisa kico ta loke nan por haci y te na unda nan por duna nan aporte, pa motibo cu nan ta compronde cu innovacion ta importante y e ta hopi bon den desaroyo pero manera semper ta keda bisa “innovacion y desaroyo mester na un manera responsabel y realistico”, el a bisa.

E kehonan ta trata cu na comienso di aña escolar aki e muchanan cu kier a bay EPI tabata scucha cu tur opleiding cu tin nan por apela na dje, esey kiermen cu por a registra, pero aworaki e muchanan a tende cu cierto opleiding no lo tin eerstejaar mas e aña aki pa motibo cu EPI mester revisa e diferente opleiding aki unda cu algun di nan no lo habri.

“Pero pa bo bisa esaki awor, un siman prome cu examen, ta hopi cortico y esaki ta algo cu si bo kier a bin cu un cambio, bo tin cu bin cune prome cu esey y anto riba dje ta buta cu si un klas mes habri opleiding nobo den cuadro di innovacion cu tin cu pasa, nan ta bisa cu e cantidad cu nan ta habri no ta suficiente y esey ta nifica cu lo tin mucha cu no lo por aplica y no lo tin scol”.

Esaki ta algo cu SIMAR tin cu verifica manera Albertus a declara y si ta asina, e ta puntra: ki solucion gobierno tin pa e muchanan aki? unda e muchanan no por ser perhudica na e momentonan aki ora cu nan tin nan examen, “e no ta husto pa nan tampoco”.

El a splica cu e ta compronde cu cierto opleiding mester di innovacion y mester bin cu cambio pero e ta di lamenta cu ta warda te awor pa bin cu esaki “pasobra si mi scucha minister ta bisa cu for di aña pasa caba tabata papiando di innovacion riba diferente punto, awor mi pregunta ta pakico ta warda te awor? e luna aki pa bin bisa algo asina, e ta fastioso pa e muchanan”.

Asina mes, Albertus a sigura cu ayera atardi nan a manda un carta na minister Croes pa pidi un reunion cu urgencia unda e tambe a papia cu Directie Onderwijs pa asina otro siman e por haya un reunion cu minister Croes pa trece mas claridad y trankilidad den e veld.

“Pa docentenan tampoco tin claridad unda prome bo ta tende cu si tur cos ta bay door, aworaki ta bin bisa bo cu no, cu ta bay bin cambio unda e docentenan tambe a haya un carta avisando nan di e cambionan, dus nan tampoco tabata sa di esaki, si ta algo cu tur hende tabata na haltura di dje e no tabata asina tampoco y esey tambe ta di lamenta”, Albertus a sigura.

Tambe, el a comenta cu tin algun docentenan cu ta bisa pakico e cambio mester ta awor? Cu si kier haci cambio mester haci’e na comienso di aña escolar y no aworaki, pa asina ey laga tur cos manera e tabata ta y despues ta wak con ta bin cu cambionan “pero esaki ta dificil, nos tin cu sinta na mesa y wak pakico a scoge esaki y con por mehora, sino tin un solucion, ki otro opcion e alumno tin pa e no keda otro aña sin scol? sin otro opleiding pa e por bay”.

Riba rednan social tambe por a mira diferente reaccion di docentenan pa loke ta trata un comunicado di prensa di minister Croes unda ta indica cu “mi sa cu ora nos ta drenta periodonan di cambio, modernisacion esaki semper ta trece su inkietudnan cune y mi kier a trece e trankilidad na e veld di enseñansa. Mi ta kere sigur cu modernisacion lo sirbi e pais aki pa dilanti na e miho forma y nos ta consciente cu esaki tin su inkietud nan cune, mi a pidi y ta pidi a traves di comunicacion y colaboracion loke mi a bin ta implementa y pidi hunto nos lo por logra e proyectonan aki y haci nan exitoso”.

Un di e reaccionnan pa esaki tabata: “Cambio den educacion lo mester haci delanta. Den e caso aki mester avisa di ora alumno ta den derde klas pa kies profiel. No UN SIMAN prome cu examen cuminsa e mucha ta haya tur e cambionan den scochi tira manera ta hende sin balor e ta cu tur su consecuencia”.

Pa finalisa, otro usuarionan a comenta cu “na luna di augustus lo sinti kico lo ta e consecuencia pa cu e cambionan aki” y “Pakico stop e opleidingen y baha e cantidad di e klasnan. En bes educacion bay dilanti ta bay 3 a 5 stappen atras. Anto asina, nan ta promove e studiantenan sigi studia”.