Awe a tuma luga e tratamento di caso Apollo caminda ta acusa e sospechoso A. Rasmijn di extorsion y asesinato di e conocido personahe Poentje Castro ariba dia 23 di december 2010. Un tratamento cu a dura paracticamente casi full dia y di cual hues lo dicta veredicto dia 24 di mei.

Fiscal di Ministerio Publico, P. van der Biezen a declara algun punto importante cu su colega fiscal a trece pa dilanti na momento di presenta e caso dilanti di hues. E caso aki ta uno excepcional ya cu despues di mas di 10 aña di e asesinato ta tratando e caso den corte.

Fiscal Van der Biezen a splica cu na 2010 ora cu e asesinato a tuma luga e investigacion a cuminsa y na dado momento e sospechoso A. Rasmijn ya caba tabata den bista di husticia y a wordo scucha e tempo ey como sospechoso. Pero na september di 2011 pa un of otro motibo e investigacion e tempo ey a stop.

E fiscal encarga cu e caso a indica cu den e investigacion aki, durante e periodo 2010 pa 2011 tabatin cierto cosnan cu no a bay manera debe ser y un di nan ta cu e parti investigativo no tabata optimal e tempo ey.

“Lamentablemente nos tin cu bisa esey y mi no ta ‘kinan pa haciele mas bunita di loke e ta, absolutamente cu no y tambe mi tin cu bisa cu un di e trabou cu nos tin como fiscal y Ministerio Publico ta duna guia den e investigacion y esey tambe mi tin cu bisa cu por tabata miho e tempo ey”, Van der Biezen a indica

Pero el a remarca cu esey no ta kita cu nan haci un revision na 2019 na unda cu un ekipo nobo cu wowonan fresco a bin hunto y a tuma e investigacion di nobo, a cuminsa cune pa asina por a presenta un caso cu Ministerio Publico ta haya cu tin suficiente prueba pe.

Fiscal van der Biezen a subraya tambe cu lamentablemente na momento cu e ekipo nobo a bin hunto pa haci e revision, den e transcurso di añanan diferente documento original no tabata tey mas, pa un of otro motibo y el a mensiona cu naturalmente ta keda na decision di e hues pa evalua ki balor e ta duna na e prueba nan, e documentonan cu no ta original.

Pa loke ta e pruebanan cu Ministerio Publico a haya relevante den e caso, un di esakinan ta e declaracion di testigonan cu a wordo duna cu ta indica cu nan a wak e sospechoso, A. Rasmijn, na e sitio un rato despues, cu segun Ministerio Publico, Sr. Poentje Castro mester a fayece.

Tambe tin video camara cu ta pone Sr. Rasmijn na e sitio y ademas e declaracion di e sospechoso mes tambe ta indica cu e no ta nenga cu e tabata na e luga di asesinato. E motibo pakico e tabata eynan, fiscal Van de Biesen a menciona, e sospechoso ta duna un of mas declaracion di dje.

Un prueba hopi importante u Ministerio Publico tambe a presenta ta un grabacion cu tin caminda cu e sospechoso Rasmijn hunto cu un co-sospechoso na e momento ey a wordo graba den un bus sin cu niun di dos tabata sa.

“A base di eseynan nos ta haya cu e pruebanan ta legal y convincente y a base di eseynan e tin cu wordo sentencia”, el a agrega.

Pa loke ta e defensa, fiscal van der Biezen a indica cu el a scucha un punto cu e ta haya lamentablemente. Defensa a trese pa dilanti cu Ministerio Publico of e fiscal encarga cu e caso lo a traha un deal cu e co-sospechoso e tempo, Sr. Gonzalez. Algo cu e ta enfatisa ta absolutamente mentira.

El a subraya cu defensa tin e libertad di trece cierto puntonan pa dilanti, pero na momento cu trece cierto puntonan pa dilanti nan mester sostene e puntonan ey tambe. “Mi ta haya algo basta serio na momento cu bo ta bisa esey, bo ta bisa cu tin un deal pero na ningun momento bo por sostene y bo no tin e posibilidad pa laga scuch’e como testigo pa bo verifica of bo mes haci pregunta y den corte sib o ta core bisa algo derover”, el a remarca.

Pa loke ta trata e castigo, Ministerio Publico a pidi 16 aña y esey, fiscal Van der Biezen a indica nan ta kere den e caso aki, mirando e tempo cu a pasa, lo ta uno na su lugar

Abogado defensor di e sospechoso A. Rasmijn, Vito Carlo, tambe a haci su declaracionnan den cual el a indica cu Ministerio Publico no a investiga suficiente. “Ami t’ey eynan pa defende mi cliente cu inocentemente ta wordo acusa di ta envolvi. Mi ta compronde loke Ministerio Publico ta bisa cu nan kier pa e famia tin ‘closure’ [clausura], pero no ta mi trabou esey ta, esey ta trabou di Ministerio Publico y den mi opinion nan no a haci un bon trabou of no suficiente”, el a relata.

El a subraya cu ministerio Publico a enfoca solamente riba su cliente siendo cu, segun e abogado, tin hopi indicacion cu tin algo otro por a pasa cu no tin di haber cu su cliente, y esey no a wordo investiga.

Abogado Carlo a remarca cu Misterio Publico tin su opinion y tin nan rason pakico persigui su cliente, mescos cu e ta convenci cu su cliente ta inocente, Ministerio Publico ta convenci cu e ta culpabel. Pero den su opinion nan a investiga solamente rond di su cliente siendo cu tin hopi indicacion cu tabatin otro hende na e sitio ora cu su cliente ya no tabat’ey, y esey no a wordo investiga.

El a menciona tambe cu di e 17 testigonan cu scucha tiro e anochi di e asesinato di Poentje Castro, 2 so a scucha e tironan ora cu su cliente tabata na sitio y 15 otro testigo a scucha algo ora cu su cliente no tabata na e sitio mas. Y e 15 testigonan a declara cu ora nan a scucha tiro nan a wak un scooter cu dos hende riba dje, na un ora cu su cliente no tabata eynan.

Pa loke ta trata e prueba di combersacion graba sin cu e sospechosonan tabata sa di esaki, e abogado a indica cu e no ta haya bon con Ministerio Publico a trece esaki dilanti, pasobra nan a trece e parti cu nan ta haya importante so pa dilanti cu ta unda cu e sospechoso Rasmijn ta bisa e co-sospechoso e tempo ey pa retira locual el a bisa y e ta sali liber.

Pero segun el a enfatisa nan no a enfoca ariba e 24 biahanan cu su cliente a bisa cu e no tin nada di haber cu e asesinato, cu ta droga el a bay cumpra.

Abogado Carlo a remarca cu for di comienso el a pidi e proces verbal di 2011, pero a bisa na su persona cu no tin. Segun e abpgado su cliente a wordo yama por lo menos seis biaha pa bay declara, pero dos proces verbal so nan a mustra y a bisa cu esey so tin y despues a indica cu no tin e proces verbal di 2011 completo.

Pa loke ta trata e autopsia y e ora specifico di fayecimento di e victima, e abogado a splica cu segun autopsia BFTO ta relata e victima a muri door di sangramento na su pulmon door di e tiro na pecho. Di otro banda e patholoog anatoom ta bisa esey no ta klop, cu ta e tiro na e nek a pone perde sanger y esey tabata e causa di morto, pero no tin un ora exacto cu ta indica ki ora e victima a fayece. “Den mi opinion bo no por yega na e conclusion cu e victima a muri 10:34 of net despues. No tin suficiente prueba pa esey”, el a enfatisa.

Pa loke ta e rapport di e psikiatra, e conclusion di e rapport cu tanto tabata wordo spera, a indica cu e sospechoso tin problema mental y cu e mester ricibi tratamento. El a indica tambe cu e sospechoso sa y ta na altura di kico ta pasando, pero cu e por lubida cierto cosnan of por bruha lihe.

Hues lo duna su veredicto ariba e caso dia 24di mei pa 4or di atardi.