Pa basta tempo caba por tuma nota cu e problema di e planta di refina awa di riool (RWZI) na Bubali Plas, no ta mehorando. E holor cu ta sali di e planta ta uno insoportabel pa tanto turista como local. Sra. Tisa LaSorte, directora di AHATA, ta splica kico esaki nifica pa economia di Aruba y kico AHATA su proposicion pa mehora e problema aki ta.

Sra. LaSorte ta splica cu e preocupacion nota solamente pa e problema actual, pero tambe pa e peliger cu e problema ta crea pa Eagle Beach y Palm Beach. “Nos beachnan ta e recurso natural cu nos economia ta depende riba dje y si nan wordo contamina e ta un crisis economico mas grandi cu esun di COVID.”

E procesamento di awa di riool ta asunto di obra publico y ta un responsabilidad pa cual tur persona ta paga impuesto p’e. E ta señala cu e gobiernonan di ultimo decadanan mester a sigura cu tin presupuesto y accion pa DOW por mantene e planta den condicion necesario pa e crecemento di Aruba su poblacion y actividad economico.

AHATA a tene reunion cu varios experto riba e tema y na februari 2020 a manda un carta, un biaha mas, pa alerta ariba e urgencia di e problema y AHATA a ofrece un solucion. “Tin compania experto cu ta interesa den inverti den un planta completamente nobo y bende e awa procesa na hotelnan cu por usa e awa den hardin”, Sra. LaSorte a bisa. “Por bende e awa na prijs barata na agricultor y campo di golf tambe. Un solucion asina no ta costa gobierno y lo sigura mantencion continuo di e planta den futuro. Ademas tin entidad financiero cu ta dispuesto pa financia instalacion di un planta nobo pa gobierno. En todo caso, nos no por warda te ora e baca a hoga pa soluciona e problema.”

 

Sra. LaSorte ta splica cu e efecto negativo pa e economia di Aruba ta uno cu ya caba Aruba a pasa aden y cu mester haci todo lo posible pa evita. Si no tin beach limpi no tin turismo y sin turismo no tin economia. “Nos ta supone tur hende a siña esey na 2020”, el a agrega.

Aruba a mira un recuperacion di turismo den luna di juni te cu augustus, na final di augustus ya e turismo a cuminsa sinti e efecto di e variante Delta. Esaki a pone cu tabatin hopi cancelacion y e recuperacion a ricibi un golpi duro. Sra. LaSorte ta enfatisa cu aunke semper lo tin variante nobo, e comportacion di e comunidad ta locual ta determina si nos ta experiencia un ola grandi di contagio.

“E ultimo ola a causa cu CDC a hisa alerta di biahe pa Aruba, y hotelnan a ricibi cancelacion cu a causa un perdida averahe di 6 punto di grado di ocupacion. Nos ta premira cu September y Oktober tambe ta afecta negativamente ainda y lo tin recuperacion limita, mientras cu pa November y December nos por experiencia mihor recuperacion atrobe”, el a splica.

 

LEAVE A REPLY

Please enter your comment!
Please enter your name here