Den nos columnanan semanal, nos a toca e tema di AI varios biaha. Tambe nos sa cu bao pueblo tin varios pregunta, opinion y preocupacion tocante e fenomeno di AI.

Mi persona hunto cu Aaron Bislip ta bao di e creencia cu e bentaha di AI mester ta algo cu full pueblo di Aruba por gosa di dje. Den e cuadro aki, hunto cu Centro di Bario Noord, nos organisa e sesion inaugural di AI pa Pueblo. E sala tabata yen yen, y tabatin discusionnan fuerte y apasiona di diferente di e participantenan.

Den e sesion nos a papia di riesgonan existente cu AI por trece, y tambe e impacto cu AI tin riba medio ambiente si e no wordo usa conscientemente. Nos a toca e tema di Large Language Models, y con esakinan ta funciona den un forma general, pa asina tur hende tin un nivel basico di comprendemento over con e AI di dia di awe ta hinca den otro.

E sesion a caba cu un curso breve di Prompt Engineering. Esta e tecnica y strategia cu un persona por usa pa haya e miho resultadonan di AI. Esaki ta un parti esencial den e soño di mi persona y Aaron tin pa cu Aruba. Nos mision ta pa por lo menos 5.000 hende na Aruba tin un nivel basico di comprendemento cu habilidad necesario pa por traha cu AI.

Nos a duna ehempel nan hopi clave, manera con den 10 minuut un AI por traha un beleidsrapport completo di 40 pagina. Den un otro ehempel nos a mustra con AI por yuda studiantenan di famianan di menos recurso pa cu huiswerkbegeleiding, esta pa traha extra opdrachten di training di por ehempel Scheikunde, Natuurkunde y Wiskunde cu nan antwoordsluitel.

Aunke e sesion inaugural tabata un exito inmenso, ta te tanto conocemento por ser comparti den 2 ora. Pa e motibo aki, AI pa Pueblo lo regresa na Centro di Bario Noord, Diahuebs, dia 25 di Juni, fo’i 2:30PM – 4:00PM. Tambe lo tin un sesion di AI pa Pueblo na Centro di Famia Piedra Plat, riba diasabra 27 di Juni, for di 7PM – 9PM.

Ta importante pa full pueblo ta envolvi, den e revolucion tecnologico aki di AI.
Pa e motibo aki, nos kier invita full pueblo di Aruba pa trece tur nan pregunta, preocupacion y problemanan unda nan ta pensa cu AI lo por yuda nan cu esaki.

Un danki inmenso ta bay na Centro di Bario Noord & Centro di Famia Piedra Plat, pa sostene e actividad aki.