Den un entrevista cu Bon Dia Aruba, Rene Bernabela, presidente di sindicato TOPA, a splica tocante e situacion na Migracion Aruba. Recientemente e sindicato a reuni cu esun encarga cu maneho di e departamento, como tambe e Departamento di Recurso Humano.

Bernabela a splica cu actualmente e situacion na Migracion Aruba ta ‘status quo’ mirando cu ainda tin reunion ta tumando luga pa yega na e parti di finalisacion cu ta e ‘FormatieRapport’. Sinembargo, el a bisa cu no ta asina leu, pa motibo cu tin detaye cu mester ser aclara.

“Mi ta kere na final, ora cu Departamento di Recurso Humano por tin un bista total pa locual ta e Formatie Rapport, mester mand’e pa sindicato pasa over di esaki pa despues duna comentario pa directiva”, el a expresa.

Sindicato a sinta cu Departamento di Recurso Humano, Departamento di Migracion Aruba y Bureau di Minister di Husticia, Andin Bikker (POR). Bernabela ta bisa cu tin speransa pa normalisa e hecho, mirando cu esnan cu a tuma over e situacion di departamento di migracion a compronde cu ta ‘tuma hopi trabou pa bin bek’ pa pone e departamento riba un liña y con e maneho mester ta y cana cune.

Bernabela a remarca cu e proceso ta tuma su tempo. “Ora bo ta papia di un formatierapport ta,un restructuracion di un departamento, den e caso aki di migracion. Manera e keda cla y wordo ehecuta, no por draai esaki of cambie den su totalidad bek.”

Nan lo tuma nan tempo pa por studia tur aspecto necesario pa locual ta trata e departamento y kico e ta rekeri. No solamente den e parti di formatierapport, pero tambe con e maneho interno mester funciona den futuro.

Na momento cu e keda cla, ta parti na sindicato pa e firmamento. Tambe el a agrega cu na comienso, Ministro Bikker a duna su aprobacion cu tur promocion pendiente tambe lo keda cla hunto cu e formatierapport.

Den caso cu no keda cla, sindicato TOPA no lo firma esaki. “Na momento cu formatierapport keda cla, e promocion tambe mester keda cla pareu. Sino sindicato TOPA no lo firma. E ta un palabracion mutuo cu TOPA y Ministro di Husticia”, el a expresa.

Ministro a nombra un funcionario publico di fam Matos, kende ta esun encarga cu e maneho di migracion. “Nos ta sinta na mesa hunto cu Matos di Departamento di Migracion y Departamento di Recurso Humano di formatierapport y parti di promocion pendiente.

 

LEAVE A REPLY

Please enter your comment!
Please enter your name here