Durante un conferencia di prensa diaranson atardi, Minister di Turimo y Salubridad Publico, conhuntamente cu CEO di Aruba Airport Authority (AAA), Sr. Joost Meijs, CEO di Aruba Tourism Authority (ATA), Sra. Ronella Croes y CEO di Sarpa Arilines, Sr. Carlos Mesa a anuncia cu Sarpa Airlines lo cuminsa cu vuelonan directo for di Colombia pa Aruba cumindando dia 2 di januari 2022.

Sr. Mesa, CEO di Sarpa Airlines, a anuncia e noticia di conectividad entre Aruba y Colombia cu ta forma parti di reactivacion economico cu nan ta pushando den e region. “Pa nos di Sarpa e ta un placer pa ta na Aruba y awe nos tin hopi bon noticia di conectividad pa e isla y conectividad tambe pa Colombia, noticianan di reactivacion y noticianan cu ta yena nos cu hopi energia pa caba di enfrenta e momentonan dificil cu nos ta pasando aden”, el a bisa.

Sarpa ta un compania cu mas di 41 aña den e mercado cu tin dos liña di negoshi, un liña di charters y un liña di air ambulance. Den e ultimo 18 aña Sarpa a conecta continuamente e tres islanan di Aruba, Boneiro y Corsou a traves di su servicionan di air ambulance y salud pa Colombia hibando pashent y treciendo nan back. Sr. Mesa a enfatisa cu e servicionan cu a wordo brinda durante e tempo ey ta continuo sin interupcion tanto den e liña di negoshi di charter y como tambe esun di air ambulance.

El a sigui splica cu na 2018 e idea a nace pa forma un aerolinea regular di pasaheronan. E tramitenan a cuminsa na Colombia na 2019 pero lastimamente e pandemia a yega y a stop e plannan pa un tempo pero segun el a indica ya caba Sarpa ta completamente certifica y ya caba futuro pasaheronan por cuminsa cumpra e ticketnan di vuelo ariba e website di Sarpa na un prijs di promocion.

Medellin y Barranquila ta e dos ciudadnan principal cu ta bay conecta directamente cu Aruba. Sr. Mesa a indica cu e ruta entre Baranquilla – Aruba y Rio Negro – Aruba lo cera e aña aki cu mas o menos di 10 mil pasahero y den e mesun ehercicio ey Sarpa ta spera cu pa otro aña nan por mobilisa algo cerca na 15 mil pasahero conectando entre Baranquilla y Rio Negro cu Aruba impulsando asina e conectividad directo evitando e centronan di conexion.

Adicionalmente Sr. Mesa a anuncia cu na Colombia ya caba nan a ricibi e autorisacion inicial pa cuminsa cu e proceso di certificacion operacional na Colombia pa e ruta Aruba – Cali cu nan ta spera di por termina e fase aki pronto y Cali lo ta un tercer oportunidad pa conecta Aruba cu Colombia.

Oduber tambe presente a expresa su gratitud y e importancia di e anuncia aki pa e turismo di Aruba. “Como Ministerio nos ta enfoca ariba e diversificacion di nos mercado turistico na America Latino, specialmente Colombia cu ta brinda nos hopi oportunidad nobo y nos ta hopi contento awe y agradecido di por anuncia dos conexion nobo di Colombia pa Aruba cu ta bay habri horizontenan nobo cu ta bay impulsa nos economia”, Oduber a bisa.

El a splica cu Ministerio di Turismo ta kere firmemente den e mercado di America Latino y conhuntamente cu ATA nan ta invertiendo pa yena e stoelnan disponibel, y cu manera e CEO di Sarpa a menciona caba, tin un capacidad di trese 15 mil turista di Colombia pa Aruba. Oduber a indica cu Colombia ta un mercado cu ya nan a explora cu ATA y nan lo haci nan esfuerso pa percura pa sigui explora e mercado ey cu ta un mercado cu por trece hopi turista y cu tin hopi beneficio pa e isla di Aruba.

“Nos ta gradici e CEO di Sarpa y e doñonan di Sarpa pa pone nan confiansa den nos producto Aruba. Tabatin temponan hopi dificil pa Aruba y ainda nos ta den e pandemia y no obstante esey Sarpa a demostra un confiansa grandi pa cuminsa dos ruta nobo cu e posibilidadnan pa amplia mas destinacionnan den Colombia”, Oduber a agrega.

CEO di AAA tambe a indica cu cu e ta hopi contento di por ta parti di e anuncio di Sarpa di nan operacionnan comercial nobo pa e Aeropuerto Internacional Reina Beatrix di Aruba. “Nos ta partner caba cu Sarpa pa e servicio di air ambulance y aworaki nos ta spera cu nos por sigui fortalece nos partnership pa medio di nan servicio di vuelonan comercial”, el a bisa.

Sr. Meijs a indica cu esaki ta e fase uno di e comercial di Sarpa y cu esakinan lo expande e conexion cu America Latino. “Nos ta sigur cu e conexion adicional aki cu Colombia lo ta uno exitoso y Sarpa ta un adicion cu nos ta yama bon bini na nos network actual y sigur e lo fortalece nos recuperacion economico”.

Sra. Ronella Croes, CEO di ATA, a indcia cu e noticia di e vuelonan nobo cu lo bay cuminsa ta papia di e resilencia cu Aruba tabatin durante e temponan dificil aki pa e industria di turismo. El a enfatisa cu e vuelonan nobo aki definitivamente lo stimula e recuperacion continuo di e turismo di Aruba y nan ta hopi agradecido di conta cu un partner nobo pa conecta Aruba cu e region di America Latino.

El a elabora ariba kico e noticia aki kiermen pa e turismo di Aruba unda cu el a splica cu e sociedad nobo aki ta stimula e crecemento turistico di Aruba superando e proyeccionnan cu ATA tabatin. Segun el a splica, e calculonan inicial di recuperacion pa 2021tabata entre e 45% y 60% di e cantidad di turista cu Aruba ricibi na aña 2019. Papiando di Colombia specificamente, e oficina di ATA ta wak cu optimismo e final di 2021 debi cu e mercado di Colombia a aumenta e number di pasaheronan cu un tarifa di recuperacion di yegada di 108%, compara e yegadanan cu aña 2019.

“E pais cafetero ta deslumbra manera e mercado principal y di mas importancia di America Latino pa Aruba pa e ciere di 2021, pero tambe pa 2022. Na final di october di e aña aki Aruba a ricibi un total di 15.398 pasahero for di Colombia. Danki na e cifranan aki ta cu socionan manera Sarpa ta wak e potencial di Aruba”, Sra. Croes a indica.

El a splica cu e frecuencianan nobo di Sarpa Airlines lo yuda, cu un parti, pa aumenta e cantidad di pasaheronan for di Colombia y lo apoya den e logro di e scenarionan realista y optimista cu ATA ta proyecta pa 2022. E scenario realista ta duna un recuperacion di 40% di e turistanan di Colombia compara cu 2019 y e scenario optimista lo por duna un total di recuperacion di 67% di turistanan di Colombia compara cu 2019 .

 

LEAVE A REPLY

Please enter your comment!
Please enter your name here