Social Crisis Plan su meta ta pa desaroya un sistema nacional di proteccion di mucha. E pensamento tras di esaki ta cu violencia den tur sentido ta afecta un mucha of un hoben y pa evita esaki nan mester wordo proteha.

Na 2018, a haci un “quickscan” di e “knelpunten” den nos sistema, esaki a wordo ehecuta door di un partido neutral: Unicef Hulanda. Social Crisis Plan tin un total di 20 socio y tin 31 proyecto bao di auspicio y ta conta cu un total di 62 profesional cu ta laborando den diferente instancia y organisacion, segun un comunicado di gobierno.

A introduci e metodo di Signs of Safety pa anda cu caso di abuso di menor:

Durante e trayecto Social Crisis Plan organisa entrenamentonan di e metodo di “Signs of Safety” pa tur e profesionalnan den tur 4 sector: Social, Hudicial, Enseñansa y Salubridad cu ta traha directo cu mucha, hoben y nan famia. Door di e training aki awe tur profesional den tur 4 sector por traha a base di un solo metodo pa asina maneha un caso di (sospecho) di abuso di menor na un forma structura y mas eficiente.

A introduci e Ley di Codigo di Proteccion:

E trayecto di implementacion di e Codigo di Proteccion ta un preparacion pa asina esaki wordo hancra den Ley pa proteha nos menornan di edad. Profesionalnan den tur 4 sector ta haya e guia, informacion y ta wordo sosteni pa cu e preparacion di implementacion di e Ley aki pa e Lidernan di Proyecto di cada sector di Codigo y tambe Unicef Hulanda.

A habri e Centro pa Hoben y Famia:

Den cuadro di prevencion, Social Crisis Plan a habri e Centro pa Hoben y Famia na Sabana Blanco/Wayaca, caminda ta traha preventivamente bao di un solo dak pa yuda fortalece e famianan vulnerabel den nos comunidad. Un total di 7 organisacion ta forma parti di e centro y ta riba e tereno preventivo. Por acudi libremente cerca nan pa guia, informacion, curso etc. pa tur loke tin di haber cu mucha, hoben y famia.

A realisa e “Tienermoederhuizen” na Casa Cuna Progreso

Social Crisis Plan a pone fondo disponibel pa asina realisa e proyecto di e casnan di cuido pa mamanan hoben na Casa Cuna. E proyecto di Tienermoederhuis ta brinda mamanan hoben e guia y sosten pa lanta nan baby canamento bao guia di profesionalnan.

Preparando pa habri e prome Centro di Cuido 24/7 pa nos menornan cu capacida limita:

Actualmente ta finalisando e proceso di preparacion pa asina habri oficialmente e prome Centro di Cuido pa personanan cu capacidad limita cu ta rekeri cuido 24 ora pa dia, 7 dia pa siman. Esaki ta un proyecto cu a wordo realisa door Stichting Ambiente Feliz bao di guia di Social Crisis Plan. E centro aki lo ta ubica na Palisiaweg na San Nicolas.

Social Crisis Plan tambe a duna fondo na Stichting Ambiente Nobo pa asina nan por brinda un programa pa personanan cu capacidad limita. Aki nan por pasa dia y haya cuminda. Nan ta ser ofreci un programa pa nan desaroyo.

A aloca fondo pa expande capacidad di estadia pa victima di violencia domestico:

Social Crisis Plan a pone fondo disponibel na Fundacion Hende Muhe den Dificultad (awo Fundacion Contra Violencia Relacional) pa asina expande nan capacidad di “kamers” of estadia pa victimanan di violencia domestico. E meta tras di esaki ta pa crea mas espacio pa duna servicio na personanan cu a pasa den violencia relaciona. Alabes FHMD/FCVR a haya fondo di Social Crisis Plan pa emplea mas personal profesional.

Pronto lo introduci e prome “Family Justice Center na Aruba:

Actualmente ta trahando cu diferente “stakeholders” den sector Husticia pa introduci e concepto di un “Family Justice Center” na Aruba. E centro aki lo traha riba e parti curativo y brinda victimanan e asistencia y guia den nan caso. Pa e proyecto aki Social Crisis Plan a busca un vertrouwen arts.

A yuda cu fondo pa asina Directie Voogdijraad por a emplea mas personal pa haci trabaonan di investigacion di casonan. Awo cu tin mas personal Voogdijraad a logra na reduci e listanan di espera cu tabata tin.

A realisa pa introduci e servicio “outreachend” pa anda cu casonan di adiccion y problema cu salud mental bao di nos hoben y muchanan:

Social Psychiatrische Dienst (SPD) di DVG ta dunando servicio psikiatrico na pashentnan na cas. Esaki a wordo realisa danki na e sosten di Social Crisis Plan cu a pone fondo necesario pa introduci e Fact-team cu ta duna e servicio “outreachend” na hoben y mucha cu tin problema cu adiccion y of problema cu salud mental.

Social Crisis Plan alabes a zorg pa fondonan ta disponibel pa asina por a emplea mas psicologo y psychiater cu actualmente ta tragando den diferente departamento y organisacion.

Asina por sigui menciona mas proyectonan cu ta cay bao di auspicio di Social Crisis Plan. E meta primordial di e programa aki ta pa brinda nos muchanan, hobennan y nan famia un sistema di proteccion fuerte y solido, paso nan siguridad y bienestar ta responsabilidad di nos tur. Pa mas informacion di nos proyectonan y documentonan por bishita nos website www.scparuba.com.