Solar Orbiter di Europa y NASA a lansa den espacio diadomingo den un mision sin precedente pa saca e prome potretnan di e polonan elusivo di Solo.
E astronave di $1.5 biyon lo uni e Parker Solar Probe di NASA, lansa un aña y mey atras, pa yega peligrosamente cerca di Solo pa revela su secretonan. Mientras Solar Orbiter no lo acerca suficiente pa penetra e corona di Solo – of su atmosfera exterior – manera Parker e lo maniobra den un orbita fuera di plano cu lo tuma over ambos polo, di cual nunca antes a saca potret. Hunto cu observatorionan poderoso na Tera, e duo espacial observando Solo lo ta como un orkestra, segun Gunther Hasinger, director cientifico di Agencia Espacial Europeo (ESA).
A construi Solar Orbiter na Europa, hunto cu nuebe instrumento cientifico. NASA a provee e di 10 instrumento y a prepara e lansamento anochi for di Cape Canaveral.
Alrededor di mil cientifico y ingeniero na Europa a reuni cu nan coleganan Mericano bou un luna yen mientras e raket Atlas V di United Launch Alliance a despega, iluminando shelo pa varios miya. Publico tambe a observa riba caminda y riba beach.
E raket tabata visibel pa cuatro minuut completo despues di despega, un strea briyante den shelo di anochi. NASA a declara esaki exitoso un ora y mey despues, unabes Solar Orbiter a habri su halanan solar.
Solar Orbiter – un astronave di 4mil libra cu cantidad di antena y instrumento – lo pasa banda di Venus na december y atrobe proximo aña, y despues banda di Tera, usando e gravedad di e planetanan pa altera su ruta. Operacionnan cientifico completo lo cuminsa fin di 2021, cu e prome encuentro cercano cu solo na 2022 y otronan cada seis luna.
Solar Orbiter lo yega dentro di 42 miyon kilometer cerca di Solo, dentro di e orbita di Mercurio, pa bula cerca di e polonan.
Polonan Solar ta marca pa buraconan coronal scur cu ta cambia constantemente. Nan ta ‘hubs’ pa e campo magnetico di Solo, cambiando polaridad cada 11 aña. Solar Orbiter lo mester entrega un bista completo 3D di Solo, 150 miyon kilometer for di nos planeta hogar.
E observacionnan lo duna revelacion di otro streanan, dunando pista riba e habitabilidad potencial di mundonan den otro sistemanan solar. Na cas, e hallazgonan lo yuda cientificonan mehora pronostico di tempo, cu por afecta comunicacion.
