Sospechosonan den atake mortal na Mallorca negociando nan entrega

(NLTimes) – E ciudadanonan Hulandes sospecha di ta involucra den un atake na Mallorca cu a laga un homber Hulandes di 27 aña di edad morto, ta purbando di negocia nan entrega na autoridadnan. Un ‘ehercito di abogado’ tanto na Hulanda como na Mallorca, Spaña, ta purbando di preveni extradicion di e sospechosonan na Spaña, pa haya sa ken ta acusa di kico, y pa negocia entrega na autoridadnan Spaño, segun RTL Nieuws ta reporta.

Durante oranan trempan di dia 14 di juli ultimo, un grupo di 13 turista Hulandes a ataca otro cinco turista Hulandes. Tur cinco a keda herida, incluyendo Carlo, di 27 aña di edad originario di Waddinxveen, kende a fayece di lesionnan cerebral cu el a sufri na momento cu a scop su cabes mientras e tabata benta riba suelo. Autoridadnan Spaño a identifica e sospechosonan basa riba camaranan di vigilancia riba e beach unda e atake a tuma luga.

Polis Spaño tabata kier aresta e grupo na nan cas di vakantie cerca di Palma siman pasa, pero a haya cu 12 di e 13 sospechoso ya a bula back bay Hulanda. Esun cu a keda atras a wordo aresta y cuestiona, pero a lag’e den libertad despues cu imagennan di camara di vigilancia a mustra cu e no a ataca Carlo. Despues di mira e video, autoridadnan ta buscando ocho sospechoso.

Segun corant Spaño, Ultima Hora, autoridadnan Spaño kier e sospechosonan restante den custodia prome cu huicio, den parti pasobra algun di nan ta bin di famianan afluente y autoridadnan pa e motibo aki ta preocupa cu nan ta den riesgo di huy.

E investigacion exploratorio den e caso aki ta spera di a keda completa ayera. Esaki probablemente lo resulta den un solicitud pa autoridadnan Hulandes aresta e ocho sospechoso identifica.

Mientras tanto, e diario digital Geenstijl.nl a publica imagen di video graba pa un testigo cu su celular, loke a genera indignacion entre e poblacion Hulandes. Segun Geenstijl, e agresornan ta hobennan edad entre 18 y 20 aña procedente di e localidadnan mas afluente na Hulanda: Hilversunm y Bussum, mientras e victima tabata un hoben mecanico di e area mas humilde di Waddinveen.