CAFT tin comprension pa e circunstancianan special como consecuencia di Covid19, pero toch ta pidi atencion adicional di Gobierno pa yega na mehoracion di e maneho financiero. Asina CAFT ta bisa den su opinion riba e Reportahe di Ehecucion cu Gobierno a manda pa loke ta e di dos kwartaal.

Y particularmente ta urgi pa pasa e presupuesto di Aruba adapta. Segun CAFT, Aruba mester a tuma medidanan pisa a causa di Covid19, incluso ciere di su fronteranan. E impacto riba e resultado di presupuesto ta hinca den e presupuesto determina. Aruba, basa riba e sosten di likides di Hulanda y e scenarionan adapta pa reapertura di e fronteranan, a bin cu un proposicion di cambio di presupuesto cu ta mustra un nivel di mehoracion compara cu e resultado di presupuesto. Sinembargo, e proposicion nobo aki no a keda determina pa Parlamento ainda.

Cuadro di Supervision

E cuadro di supervision ta regla pa e Landsverordening Supervision Financiero Aruba y e protocol firma cu Hulanda dia 22 di November 2018, unda a bay de acuerdo cu basa riba circunstancianan por a desvia di e normanan. Con leu por desvia, sinembargo, no a keda dicidi ainda pa Conseho di Minister di Reino.

Reportahe di Ehecucion

CAFT a bisa cu mester bin mehoracion den e calidad di e Reportahe di Ehecucion, y berdad a constata cu a tuma algun paso pa mehora e balor di informacion. Asina tin mas splicacion ora cu a desvia di e calculacionnan di presupuesto y a amplia e bista riba e desaroyo di cortamento di gasto riba personal. Tambe tin mas informacion riba e continuidad di un medida di base (nulmeting) den cuadro di e posibilidad pa controla e cuentanan anual.

E resultado ta mustra por lo pronto cu tin un deficit di 269 miyon florin, cu ta un aumento di 266 miyon compara cu e prome Reportahe di Ehecucion, unda tabatin un diferencia di 3 miyon. E proposicion di Presupuesto 2020 ta tene cuenta cu un deficit di 1.114 biyon florin. Y aunke e aumento recien di e cantidad di caso di Covid na Aruba, ta anticipa cu berdad e di dos kwartaal di 2020 lo ta financieramente esun pio.

E resultadonan pa e di tres y di cuater kwartaal lo ta miho of minimalmente igual danki un parti na e continuacion di e areglo di subsidio di salario, e facilidad di sosten na Negoshinan Chikito y Mediano y e areglo di FASE. Basa riba esakinan, ta kere cu e deficit lo ta mas chikito cu locual awor ta den e presupuesto den concepto.

Debe total

E debe total di Aruba na fin di e di dos kwartaal ta 117 porciento di e Producto Bruto Nacional, of 4.666 biyon florin. E gastonan di personal a baha cu 31 miyon florin den e concepto di presupuesto, consecuencia di e reduccion di 12.5 porciento. E realisacion di e gastonan di persona den e di dos reportahe ta den liña cu e reduccion aki. Tambe a mustra cu a logra spaar 3 miyon danki na e Plan di Maneho Reduccion Gasto Personal, manera e limitacion di overtime.

CAFT ta pidi Aruba ta yega na un maneho di edificio integral, (huurmento di edificio) y un maneho pa spaar riba trahadonan externo y ta pidi pa inclui esakinan den e presupuesto di 2021 cu por cierto, no a keda presenta na Parlamento manera ley ta prescribi.

Di otro banda, CAFT ta di opinion cu riba e tereno di maneho financiero, no a logra mucho. E colegio ta enfatisa riba e necesidad pa trece e ciclo di responsabilisacion na ordo.

Cuentanan anual

Ainda no a establece e cuentanan anual pa añanan 2016, 2017 y 2018. Na e momentonan aki Parlamento ta tratando e dos promenan y CAFT ta urgi Parlamento pa conclui e trabou aki mas pronto posibel. Ta duna Aruba te cu prome di December pa caba cu e tres cuentanan anual. Tambe a palabra cu pa e aña fiscal 2020 lo tin un declaracion di accountant riba e responsabilisacion financiero segun un cuadro financiero pa metanan special. CAFT ta pidi Aruba pa inclui e planificacion di e base, pa asina permiti cu e cuentanan anual ta controlabel. Esakinan mester sosode den e Reportahe di Ehecucion di e tres kwartaal unda ta indica, cua ta e forma con Aruba lo cumpli cu e consehonan aki. Minister di Finanzas Xiomara Maduro a bisa cu Centraal Accountants Dienst, CAD, lo ta encarga cu esaki.

Entradanan

E entradanan realisa den e di dos kwartaal a yega na 518 miyon florin, cu ta 54 porciento di e entradanan cu a calcula den e concepto di presupuesto pa 2020. E entradanan a subi cu 208 miyon den e di dos kwartaal, cu ta un aumento di 22 porciento den e concepto presupuestal. E resultadonan pa e siguiente kwartaalnan lo ta miho. Pero tur esaki ta danki entre otro na e sosten di Hulanda.

E impuestonan directo a aumenta di 130 miyon di e prome kwartaal te na 233 miyon na final di e di dos kwartaal. E aumento aki ta igual na 27 porciento di e total di impuesto directo manera ta den e concepto di presupuesto. CAFT a constata cu e resultado ta miho cu locual a spera y e ta danki na un entrada mas halto di e loonbelasting. Atrobe, danki na e sosten di Hulanda pa subsidio di salario. Tambe e entrada di dividendo a presta miho.

Entradanan di e belastingnan indirecto a aumenta di 145 miyon den e prome kwartaal te na 215 miyon den e di dos kwartaal, cu ta 19 porciento di e totalidad di impuesto indirecto den e concepto di presupuesto. E resultado aki ta miho cu a spera danki na invoerrechten mas halto y tambe e BBO, debi cu a habri e fronteranan mas lihe cu a proyecta. E otro entradanan ta yega na 70 miyon cu ta igual na 35 porciento di e otro entradanan den e concepto di presupuesto. Esaki si ta menos cu a proyecta, debi na entre otro entrada menos riba erfpacht.

Debenan

E gastonan a yega na 799 miyon florin cu ta 39.1 porciento di e gastonan total den e concepto di presupuesto pa 2020. Nan ta 130 miyon mas halto cu e gastonan den e di dos kwartaal di 2019. Motibo pa e aumento ta pago adicional na ayudo social y sosten na AZV y SVB. Di un parti nan ta compensa pa e reduccion di gasto cu a introduci riba salario di personal y tambe subsidionan. Ya nan ta inclui den e concepto di presupuesto.

Pa loke ta e gasto di personal, CAFT ta spera cu ta wanta na e norma determina di maximo 476 miyon pa 2020. Manera menciona, a nota cu a spaar 3 miyon danki na reduccion di overtime, entre otro. Pero tambe a logra danki na personanan cu a sali di servicio, cu no a tuma mas hende na trabou. Esaki ta pa prome biaha cu Gobierno a duna un ilustracion con a logra esaki, cu ta un mehoracion den reportahe.

Saldo

E concepto di presupuesto ta tene cuenta cu gastonan mas abou debi na cortamento di gasto, apertura di frontera y cu esey, aumento di entrada di belasting. Particularmente a nota cu loonbelasting y BBO ta presta miho cu a spera, a pesar di e lockdown y ciere di e isla. Como tal, ta kere cu si e circunstancianan keda mescos, e buraco pa 2020 lo ta menos cu a anticipa. E punto di salida ta si cu Aruba ta sigui ricibi e sosten di likides di Hulanda y cu turismo berdad sigui crece.